提起馬桶，大家都知係專門收集穢物嘅東西。諗唔到嘅係，香港居然淪為內地「輸出」假難民嘅馬桶，問你怕未。

隨着中港兩地交流日益頻繁，南亞假難民紛紛以內地作為跳板偷渡來港，成為禁之不絕嘅巨大漏洞。呢，尋日早上又有一批南亞人蛇喺大嶼山搶灘，警方展開水陸大圍捕，幾經辛苦至拘捕七人，懷疑又係從內地乘舢舨偷渡。

假難民源源不絕，唔止愈來愈多，而且愈來愈猖狂。日前入境處揭發兩名乘直通車抵港嘅印度籍男子有可疑，拒絕入境並即時安排遣返內地，點知兩人居然亡命跳軌，逃去無蹤。家陣連直通車都成為假難民湧港嘅捷徑，香港想唔變「難民港」都唔得喇。

係人都知，唔少南亞人蛇喺祖家或者逗留內地時已經案底纍纍，內地當局任由佢哋來港，即係當香港做馬桶，幫內地「排毒」，簡直靠害。正如立法會議員話齋，內地經濟最近唔係咁好，刑罰又比香港嚴厲，偷渡浪潮隨時愈演愈烈都似。正所謂，治病治病源。內地成為假難民來港嘅源頭，港府一日唔要求內地當局協助堵截，人蛇都會源源不絕，就算點樣檢討機制，點樣加強把關，都係嘥氣嘅咋！

唔係講笑o架，假難民為咗來港無所不用其極，曾經有印度籍人士從羅湖口岸入境被拒，其後再乘坐直通車來港，抵達紅磡管制站後即刻將證件毀爛及丟棄，賴死唔走。雖然奸計最終未能得逞，但足以反映假難民經內地偷渡已成趨勢，唔到當局繼續扮鴕鳥。

北大人成日話有決心維持香港繁榮穩定，其實協助堵截假難民咪就係維持香港繁榮穩定囉。假難民源源不絕湧港，唔止耗費大量公帑，更加為社會治安埋下巨大隱患，尤其最近涉及假難民嘅罪案無日無之，販毒、打架、搶劫、非禮同打黑工已經係小兒科，家陣仲狼到當街斬人同策劃綁架添。如果內地當局可以幫香港拆咗呢個計時炸彈，話唔定政局都平穩啲，亂象都少啲！

當然喇，假難民問題遏之不絕，內地當局固然有責任，港府更加難辭其咎，當局中門大開，來者不拒，香港咪淪為人蛇最熱門偷渡地區囉。所以話，當局聲稱會檢討有關政策，徹底堵塞漏洞，唔好又係講完就算吖，家陣香港已經七國咁亂，再畀假難民搞到亂上加亂，咁就唔止淪為馬桶，隨時淪為廢墟添吖，叮！