唔怕年年估錯數 最怕財爺冇料到
中國人鍾意祈福許願，尤其係新正頭，邊個唔想大吉大利吖。所以咯喎，唔止黃大仙祠、車公廟同許願樹呢啲熱門地點連日來人潮不斷，連政府總部亦成為市民新年祈願熱點。咁又難怪嘅，新一份財政預算案就快出爐，市民趁新正頭許願，要求「財爺」開倉紓困都好正常啫。
呢，尋日又有團體到政府總部請願，要求預算案充分利用財政盈餘，增撥資源振興經濟及紓解民困，並提出十項建議，包括寬免全年差餉、提高薪俸稅、寬免公屋租金等等，鬍鬚曾聽到未吖？
講開又講，家陣香港經濟形勢麻麻地，基層市民生活艱難，唯獨港府財源廣進，庫房水浸，係名副其實嘅官富民貧。預算案派糖本來係應有之義，弊在鬍鬚曾出晒名一毛不拔，而且成日估錯數，對「狼來了」嘅把戲樂此不疲，旨意佢主動紓解民困，睇怕都係靠唔住嘅嘞。
唔係亂噏，會計界普遍預測本年度財政盈餘達到七百幾億至九百幾億元，財政儲備將增至八千五百多億元，等於政府二十四個月開支，你話係咪肥到連襪都着唔落吖？好明顯，港府又係估錯晒，舊年鬍鬚曾發表預算案時，預測本年度盈餘係三百六十八億元，同會計界人士預計嘅盈餘差天共地。無論點都好喇，既然多咗一筆意外之財，就應該好好利用，鬍鬚曾年年估錯數已經離譜，如果咁都仲唔肯還富於民，等於錯上加錯，想唔激起民怨都幾難。
係人都知，香港百物騰貴，衣食住行樣樣難，基層市民生活壓力固然爆晒燈，中產人士亦唔好得幾多，依家只係要求預算案善用盈餘派幾粒糖解吓困啫，唔係連咁卑微嘅願望都被拒絕吖嘛？鬍鬚曾月入幾十萬元，成日飲咖啡睇法國電影，究竟知唔知基層市民嘅真正苦況呢？
老實講，家陣香港立立亂，一踏入猴年就發生暴亂，搞到人心惶惶，港府還富於民，一可以紓解民困，二可以消除民怨，何樂而不為。嗱，咪話太一叮唔提醒吖，上月發表嘅施政報告劣評如潮，市民滿意度創新低，如果預算案又係冇料到，市民隨時同鬍鬚曾開年都似。
一句到尾，與其錙銖必較，受盡千夫所指，不如開倉紓困，惠及普羅大眾。出得嚟行，預咗要還，希望財爺今次唔好又詐傻扮懵喇，叮！
