天下本無事，庸官自擾之。港府施政甩漏多多，烏龍百出，本來已經亂象叢生，加上社會愈來愈政治化，事無大小都拗餐飽，搞到家嘈屋閉，香港想有運行都幾難。

好似鬧到滿城風雨嘅全港性系統評估（TSA）咁吖，檢討委員會尋日向教育局提交報告，建議今年喺全港抽出一成即約五十間小學，「試考」修訂版TSA，被抽中嘅學校可自行決定係唔係參與，即係話全港九成小三學生今年可獲豁免；至於一七年TSA嘅存廢問題，委員會傾向全面復考，而教育局就未有定案。另外，中英數三科TSA試題亦會作出微調，包括減少閱讀篇章及關聯題。

即係咁，教育局由當初企硬唔肯廢除TSA，到依家改為抽樣試考，明顯係喺民意壓力下跪低，可惜吖，部分家長仍然唔收貨，強調係咪畀小朋友參加TSA，決定權應該喺家長而唔係學校手上，又話如果當局唔肯徹底廢除TSA，唔排除請假拒考咁話。好明顯，TSA爭議已經政治化，反對聲音只會愈來愈大，當局拖得過今年，拖唔過出年，到時一樣要面對現實，想唔跪低都幾難。

所以話，早知今日，何必當初，TSA搞成咁，講到尾都係港府自己攞嚟衰。呢項評估學生水平嘅測驗，本來嘅目的係因材施教，外國亦有類似測驗，如果安排好啲，根本唔會引起咁大爭議，弊在教育官僚錯判形勢，低估民意反彈，特別係人稱「唔得掂」嘅教育局局長吳克儉一直懶懶閒，寧願去日本欣賞紅葉都唔肯面對公眾，更加係火上加油。

可能有人會話，事緩則圓，家陣爭議咁大，從長計議未必唔係好事。冇錯，香港係多元社會，莫講話TSA，即使派錢都有人反對，問題係港府一遇反對聲音就跪低，咁咪乜都做唔成？

見微知著，港府連TSA咁小事都搞到一鑊泡，只係整個香港七國咁亂嘅縮影咋。尋日立法會續審版權修訂條例，結果再度流會收場，今次已經係兩個月內第四次流會。最離譜係，反對派政客為阻止會議，無所不用其極，有人甚至「玩升降機」阻人開會，連小學雞都不如，問你服未！

事實證明，政府無能，政客無良，只能累人累物。有人就講得啱嘞，與其繼續為TSA拗到面紅耳熱，不如慳番啖氣好過，事關香港繼續蹉跎歲月，遲早玩完，到時學生考唔考TSA都冇所謂喇，叮！