政壇：每周之星：兜巴星：缺裝備跣人 黎文軒認衰

上月寒流冰封大帽山，圍困咗一班上山「追霜」嘅市民，消防員趕赴救人，結果反而齊齊因路面結冰而滑倒趴地，場面極盡蝦碌，相信大家都仲記憶猶新，消防處亦遭外界狂轟救援服務同裝備欠妥善，例如雪爪鞋數量不足，令消防員自身難保，大減救援效率。消防處處長黎文軒到尋日終於認衰，話處方已成立委員會檢討當日事故，包括向外國學習點樣喺極端天氣下進行救援，同埋研究買保暖頭套等。睇嚟黎文軒刪檔案力冚處方臭史就叻，但係一講到做實事救人，就一啲辦法都冇，淨係識頭痛醫頭，腳痛醫腳，恐怕靠佢救人都係嘥氣，港人只有自求多福咯。