話說行政會議成員兼立法會議員林健鋒嘅仔林凱章，早前被人影到同靚女前主播周嘉儀喺台北街頭手拖手，認真甜蜜。林健鋒尋日同傳媒團拜時，聽到「周嘉儀」三字，立即黑面拒評，反叫記者直接問林凱章，疑似唔太認同阿仔嘅眼光，睇嚟周嘉儀若要入林家都唔係易事。但尋日喺另一個團拜活動時，追問過林凱章拍拖一事，點知佢話團拜唔識回答呢啲問題喎，估唔到咁後生「耍太極」都咁叻！

林健鋒（資料圖片）

被問到林凱章（圖）同周嘉儀拍拖，林健鋒即時黑面。（資料圖片）

周嘉儀

傾到猴年市況，林健鋒自爆過年前，同多名城中政商要人打賭，話港股復市後，會跌破一萬九千五百點，最後果然跌到「阿媽都唔認得」，贏咗餐飯，但佢拒絕透露邊個係輸家，又話目前睇唔通後市，唔敢再開賭局住喎。佢又話因業務需要，每年都會去一次巴西，雖然當地寨卡疫情嚴重，但佢話未驚過，所以今年會照去當地，但未定實時間，到時最多着多幾件衫包實自己。

第一手消息請下載on.cc東網iPhone/iPad/Android/Windows Phone Apps