林向揚介紹數碼港新標誌時，話對英文細楷字有份親切感。
喺港島南區嘅數碼港新一年會有變動，董事局主席周文耀會退休，喺今年中任期屆滿後，退落嚟享受人生，而該公司由○二年創立沿用至今嘅標誌，亦由尋日起換新裝。數碼港行政總裁林向揚話新標誌走簡約路線，只會留下cyberport同數碼港名稱，其他裝飾都完全丟晒，字母亦用晒英文細楷，一改以前全部用大楷嘅寫法，好有親切感，冇英文大楷予人嚴肅方正嘅感覺。
點解用咗細楷會平和啲？林向揚話對佢嚟講，英文大楷字係一條刺，事關讀書時因為趕時間，做功課打字時全部用英文大楷，點知教授好介意，話唔鍾意睇全部大楷，叫佢重新打過，結果愈急愈衰，自此就覺得英文細楷好親切，相信人人都會易接受啲。不過，名稱係代表公司，用晒細楷，又會唔會太過傾向佢嘅個人喜好及觀感呢？
第一手消息請下載on.cc東網
