旅遊界最近風波不斷，香港旅遊從業員聯會榮譽會長林少麟，表明認同立法會旅遊界議員姚思榮繼續做，但如果香港旅遊業議會前主席胡兆英打算加入戰團，佢一定會出戰爭奪議席，而近日有風聲傳出，或者仲有人會染指呢個界別喎。
「法律超人」謝偉俊當年為旅遊界擔任法律顧問，仲開設旅遊顧問公司，加上佢有資深旅遊界人士支持，又狙擊旅議會「阻手阻腳」，窒礙業界自由發展，喺○八年以九票之差，擊敗旅議會總幹事董耀中而當選旅遊界議員。及至一二年立會選舉，佢再轉戰九龍東直選，結果亦順利當選。
做旅遊界顧問獲支持
林少麟代表嘅一班業界人士正正係不滿旅議會做法，呢股力量亦不容忽視。據悉自舊年起，一班導遊不時遇到惡客，被人鬧、被人打嘅情況，唔少導遊都需要尋求法律意見，原來香港律師會前會長、屯門區議員何君堯係旅行社東主協會嘅義務法律顧問，佢出盡力幫業界，提供法律意見，業界亦有唔少人支持佢。呢個情況不禁令人懷疑何君堯會唔會走謝偉俊嘅舊路，轉戰旅遊界功能界別呢？
何君堯接受查詢時話，唔會對旅遊界議席有非分之想，認為要從事相關行業先可發出相關嘅聲音，只係因嗰班旅遊界人士長期受委屈，需要幫手，而佢從事法律工作，可以做到嘅就盡做。佢又話支持全面直選，至於會唔會積極考慮參加立會新界西直選，佢話任何事情都積極考慮，最重要係先做好自己所屬嘅區議會選區，選舉都係次要，無論乜嘢平台，最重要係能夠服務市民。
第一手消息請下載on.cc東網
