政壇：每周之星：至叻星：推大嶼發展 波波願溝通

大嶼山發展諮詢委員會上月發表工作報告，勾畫大嶼山未來旅遊同經濟發展大綱，報告諮詢公眾三個月。依家初步都仲係紙上談兵，發展局局長「波波」陳茂波，早前化身推銷員，親身帶隊去大嶼山視察，期間仲遇上幾個團體示威，鬧政府假諮詢同破壞大嶼山嘅自然環境，而佢都冇左閃右避，仲話希望今年年底定出新發展藍圖同落實建議嘅時間表，務求達致發展同保育兼容，強調整個諮詢冇前設，願與居民溝通，促各方放下成見。但係齋噏冇用，係唔係真係可以跟計劃進行，就要睇波波夠唔夠牙力同政治手腕，去說服反對嘅市民。