政壇：戴耀廷扮共主被潑冷水
佔領行動發起人之一、港大法律系副教授戴耀廷喺佔領失敗後潛水多時，未曾為違法佔領負上責任，近日突然蒲頭，又拋出「雷動計劃」，稱希望協調泛民主派候選人，喺年底嘅立法會選舉爭取過半數議席。戴耀廷似乎想再一次做「泛民共主」，指點天下。但大部分政黨都對「雷動計劃」潑冷水，其中工黨雖然話願意協調，但「唔只係工黨，要所有人都有意願先得」，睇嚟成功協調嘅機會唔大。
座談會 長毛中途離場
戴耀廷似乎未有吸取佔領行動教訓，早前又喺報章撰文，提出以「雷動計劃」協調出選名單，爭取非建制派喺九月立會選舉取得一半議席。據知，戴耀廷星期二曾就計劃舉行研究座談會，整埋筆記扮教書，雖然各大政黨都有派人出席，但大家都係「左耳入右耳出」，回響不大，社民連「長毛」梁國雄更喺中途離場。
工黨尋日喺茶敍時亦有提到「雷動計劃」，新任黨主席胡穗珊認為協調只係偽命題，「都唔知要傾咩，點答你傾唔傾呀？就好似DSE ORAL（口試），點都要坐低傾十五分鐘，其實無意義」。佢又話雖然工黨願意為大局協調，但仍要「所有人都有意願先得o架」，對於協調成功大潑冷水。
除咗工黨，其他泛民政黨好似白鴿黨，早前亦曾講過話對協調成功不感樂觀，黨主席劉慧卿就多次揚言，「我選咁多年都未協調過，選到就選到o架啦」。其實，不論泛民或社運中人，都認為戴耀廷太理想主義，一來泛民個別政黨內爭出選已爭崩頭，更遑論同其他政黨協調，二來泛民嘅政治光譜愈嚟愈闊，要接觸各人已經唔容易，要所有人「聽教聽話」更加冇可能。有評論指出，所謂「雷動」唔係戴耀廷提出嘅「雷動震天」，而係「『雷』聲大雨點小的無謂行『動』」。
