堵截難民不能拖 講到做到除毒瘤

嗱，尋日又有團體遊行到政府總部示威，要求當局正視假難民問題，盡快檢討有關政策，堵塞漏洞，以免香港淪為「難民港」。請願人士批評，酷刑聲請個案至今已累積超過一萬一千宗，唔止加重納稅人負擔，仲成為社會治安隱患，促請當局盡快收緊審批程序，嚴打人蛇活動，以及即時遣返違反逗留條件或從事違法行為嘅申請人。

冇錯嘞，假難民問題日趨嚴重，為社會治安帶來嚴重衝擊，其中元朗、深水埗、尖沙咀同九龍城成為重災區，居民提心吊膽，惶惶不可終日。遠嘅唔講，近日就有多批假難民殺到，繼周一有九名南亞人蛇喺大嶼山搶灘被警方截獲後，尋日水警又喺沙頭角拘捕九名企圖偷渡嘅南亞人蛇，假難民沒完沒了，問你怕未。

即係咁，經過東方報業集團鍥而不捨揭露假難民亂象，港府係就係開始意識到事態嚴重，施政報告除咗承諾研究解決辦法，仲多謝東方嘅報道添。不過咁，講係一回事，做係另一回事，當局係咪認真解決問題，仲要睇過至知。好似當局承諾全面檢討免遣返聲請政策，包括檢討《入境條例》及加快審核程序，甚至不排除退出聯合國《禁止酷刑公約》，講到似層層，千祈唔好又係大隻講吖。正如有人話齋，港府如果繼續闊佬懶理，等於請假難民嚟打劫香港，何止居民人心惶惶，港府一樣唔會有好日子過嘅咋。

唔係靠嚇，現時難民政策漏洞百出，香港成個無掩雞籠咁，人蛇集團簡直如入無人之境。假難民一心來港食大茶飯，打黑工、犯風化案已經算係碎料，好多假難民淪為黑幫爪牙，斬人、販毒、勒索乜都做，咁先至係大鑊吖。係人都知，香港已經夠晒亂，仲要孭個假難民計時炸彈，想唔亂上加亂都幾難，難為港府仲成日話要「穩中求變、適度有為」喎，發夢就有！

一句到尾，當斷不斷，必受其亂。難民問題成為治安毒瘤，唔止測試市民嘅容忍能力，亦考驗港府嘅管治能力，如果唔盡快諗辦法清拆呢個計時炸彈，等到爆煲至補救，咁就後悔莫及嘅喇，叮！