「長恨人心不如水，等閒平地起波瀾。」呢兩句唐詩正正係今日香港社會嘅寫照，有啲人出於不可告人嘅目的，成日無事生非，無風起浪，搞到七國咁亂，永無寧日。

呢，部分港大學生聲稱不滿校委會主席人選，要求修改相關條例，廢除由特首兼任校監及委任部分校委會成員嘅制度，尋日發起罷課示威。本來係威係勢，又成立罷課委員會，又不斷呼籲學生參加，點知反應冷淡，數來數去只有大約二百人參加，不及港大學生百分之一，簡直得啖笑。

罷課搞手聲稱行動最少持續一個星期，到時再視乎實際情況及校方反應至決定下一步行動喎。可惜吖，以尋日冷冷清清嘅場面嚟睇，可能唔使一個星期已經收得檔咯。

事實證明，市民對沒完沒了嘅政治爭拗已經感到厭倦，尤其係經過前年嘅佔領之亂，好多人更加厭惡到極。講真吖，香港內鬥咁多年，成日家嘈屋閉，反對派唔厭，市民都覺得煩喇。佔領之亂持續七十九日，幾乎搞到香港萬劫不復，結果反對派都係得個吉，家陣少數學生罷課，又可以得到乜嘢呢？

講起真係令人唏噓，港大係本港龍頭大學，歷史悠久，根基雄厚，本來可以更上一層樓，可惜近年被政治入侵，校園淪為戰場，學生成為政治棋子，風雨不斷，是非多多，以致國際排名每況愈下，百年基業搖搖欲墜。罷課搞手如果真心為港大着想，就應該畀港大回歸寧靜，休養生息，而唔係不停挑起紛爭，火上加油！

最好笑嘅係，反對派成日批評外來政治干預院校自主，其實干預院校自主嘅就係佢哋。好簡單，企圖以罷課來達到政治目的，唔係干預校政又係乜吖？正所謂，名不正則言不順，言不順則事不成，罷課不正不順，唔怪得反應冷清，示威變示弱喇。

所以話，學校係社會嘅縮影，港大紛紛擾擾，咪就係香港烏煙瘴氣嘅縮影囉。隨住周邊地區不斷進步，香港嘅優勢本來已經所餘無幾，加上部分人唯恐天下不亂，搞風搞雨，更加令香港不斷沉淪。咪話唔提醒吖，如果繼續內鬥內耗，盞大家都冇運行嘅咋。

總而言之，要自救必先自強。學生如果真係愛護港大，最有效嘅方法就係努力讀書，充實自己，如果一味醉心政治，荒廢學業，唔止害咗自己，亦害咗港大，害咗香港！