無心向學搞政治 港大點會有運行

呢嗱，話口未完又嚟嘞。英國《金融時報》公布二○一六年全球百大工商管理碩士課程（MBA）排名，本港三間大學齊齊上榜，其中科大排第十四位，重奪亞洲一哥寶座；中大亦唔輸蝕，排名由第三十位上升至第二十六位，唯獨港大斯人獨憔悴，排名由第二十八位直插至第四十四位，都咪話唔得人驚。

咪以為只係個別排名出問題，早排美國一個機構公布全球最佳大學排名榜，港大喺亞洲排名跌出三甲至第五位；全球排名更加由四十二位暴跌至六十四位添。類似調查仲有好多，總之跌多升少，要數嘅話天光都未數完。

講起都唔知好笑定好嬲，呢輪港大校園鬼咁熱鬧，罷課行動風風火火，矛頭指向新上任嘅校委會主席李國章，話要檢討相關條例，廢除由特首兼任校監及委任部分校委會成員嘅制度喎。今日李國章以主席身份首次主持校委會會議，肯定會有人號召去踩場、去包圍，大家買定花生、擔定櫈仔，睇番齣造反派批鬥校委會嘅好戲喇。

呢啲咪無事生非囉！李國章初任校委會主席，做得好唔好仲未知，點解唔畀佢試吓，做得唔好再趕佢落台都未遲吖。反而港大競爭力跌跌不休，就係擺在眼前嘅事實，成日話「自己校園自己救」，諗吓計發憤圖強好過喇。

話時話，港大衰落早就有迹可尋。港大一直被視為本地龍頭大學，亦係社會各界領袖嘅搖籃，上任校長徐立之時代，港大國際排名一度躋身全球第十八位，喺亞洲獨佔鰲頭，不知幾巴閉。可惜自從「八一八事件」後，港大搞政治多過做學問，前年佔領之亂港大係大本營，去年鬧出副校長風波，今年又針對校委會主席，亂象沒完沒了，咁搞法，學校想有運行都幾難。諗諗吓，如果全球有培訓街頭鬥士、造反派嘅大學排行榜，港大肯定橫掃吖。

一句講晒，政治唔可以當飯食嘅，港大係咁，整個香港亦係咁。大家有眼見，回歸咁多年，亂足咁多年，社會墮入內鬥內耗嘅無底深淵，有人形容未到香港，唔知文革還在搞，一啲都冇誇張o架，叮！