中國對全球經濟影響舉足輕重，有人形容「中國打噴嚏，世界就感冒」。而喺香港，改為「立法會拉布，全港都感冒」一樣咁貼切。事關立法會不斷拉布流會，大小基建工程嚴重受阻，唔止打爛工人飯碗，各行各業亦受拖累，香港想唔死都幾難。

呢嗱，立法會財委會今日繼續審議港珠澳大橋五十五億元追加撥款，唔使問阿貴，反對派政客例牌拉布，今次提出超過二百項議案，雖然被主席裁剩四十八項，但一樣有排拗，預計要加開八個鐘頭會議處理，一個唔好彩，除咗呢項追加撥款過唔到，分分鐘連醫療券等民生撥款都受到影響，你話係咪累人累物吖。

除咗港珠澳大橋一波三折，高鐵工程更係多災多難。立法會工務小組日前第五度審議高鐵工程追加撥款申請，結果同樣因反對派政客全力拉布而未能表決。運房局局長張炳良重申當局面對「死線」問題，下月底就要決定係咪需要暫時停工，高鐵一旦停工甚至爛尾，損失將達天文數字喎。

高鐵爛尾，巨額公帑付諸流水不特止，七千多名工程師及工人飯碗亦隨時不保。政客有破壞冇建設，高薪厚祿袋袋平安，當然唔在乎工程爛尾，打工仔就唔同喇，手停口停，唔通旨意班政客養咩。難怪建造業聯盟忍無可忍，要求委員會主席果斷「剪布」喇。

冇錯嘞，今時今日香港問題多多，經濟前景陰晴不定，公共財政開支變得愈來愈重要。正如高官話齋，立法會作為唯一控制撥款嘅關卡，議員一味拉布阻止撥款通過，必須承受政治及經濟後果。唔係靠嚇，工務小組本年度預計審議七十二項合共六百七十五億元嘅工程撥款申請，點知去年九月復會至今只通過四項合共四點七億元嘅小型工程，而財委會更僅僅通過兩個涉款二億元嘅小項目，如果餘下項目唔可以喺今屆會期通過，就要喺新一屆立法會推倒重來，除咗影響建造業，亦拖累物料供應、採購、物流等相關行業。

所以話，政客無事生非，拉布成災，再咁落去，唔止經濟民生受損，遲早搞死成個香港咋。官媒形容「拉布」好似一隻迅速長大嘅怪獸，不斷鯨吞香港嘅資源同優勢，真係一啲都冇講錯㗎。

嗱，咪話太一叮唔提醒，今年係立法會選舉年，反對派政客繼續阻頭阻勢，盞畀選民掃地出門嘅咋，叮！