香港流年不利，頭頭碰着黑，羊年係咁，猴年亦係咁。正如玄學家話齋，經過「火焚三年」之後，猴年火氣本來應該稍為減弱，弊在流年仍然屬火，「火猴」跳跳紮，難以捉摸，加上金木交戰之局，政局動盪多變，社會爭拗不斷，睇怕呢一年都唔慌太平咯。

大家有眼見，猴年一開局已經危機處處，年初一爆發幾十年來最嚴重嘅暴亂，旺角淪為戰場；之後引發「亂世效應」，有人周圍縱火，有人威脅放置炸彈，有人更喺網上狂言捐款畀暴徒報復警察，而鳩嗚活動亦死灰復燃，簡直係七國咁亂。

呢，繼有人喺油麻地燒垃圾桶引爆氣罐後，又有狂徒喺花墟公園放火燒康文署垃圾桶同辦公室，而葵涌貨櫃碼頭嘅露天停車場更發生三級大火，幾十架車被焚毀，警方列為縱火案處理。即係咁，連串縱火案究竟有何動機，同旺角暴亂有冇關係，仍有待警方進一步調查，唯一可以肯定嘅係，香港已經成為一座危城，繼續咁樣搞落去，遲早一鑊熟嘅咋。

正所謂，綿綿不絕，必有亂結。香港之所以搞到今時今日嘅田地，激進組織固然要負上主要責任，而港府長期有法不依同樣難辭其咎。尤其經歷佔領之亂後，法治精神蕩然無存，「不守法絕對不等同不尊重法治」嘅歪理成為部分年輕人嘅金科玉律，結果咪愈來愈偏激，愈來愈暴力囉。而呢啲正正係港府姑息養奸造成嘅惡果，佔中已落幕一年有多，主要搞手及幕後黑手仍然逍遙法外，就算當局提出檢控，亦往往獲得法庭輕放，變相釋放出「犯法無罪」嘅訊息，唔怪得激進分子有恃無恐喇。

有人仲為呢啲無法無天嘅行為塗脂抹粉，美其名「魚蛋革命」，簡直唯恐天下不亂。老實講，如果咁都算係革命，伊斯蘭國就唔會被視為恐怖組織喇。伊斯蘭國本來只係一班烏合之眾組成，由於西方國家放任自流，卒之逐漸壯大，危害全球。雖然本港激進組織暫時難以相提並論，但近年不斷搞事，而且愈來愈激，再咁發展落去，冇人敢擔保香港唔會出現恐怖組織o架。

正如學者警告，旺角暴亂只係暴力嘅開端，喺漣漪效應之下，小規模破壞行動隨時演變成新一輪亂局。冇錯嘞，星星之火，可以燎原，今日就話火燒垃圾桶同貨櫃啫，有人燒吓燒吓燒上癮，點知聽日會唔會燒建築物o架，叮！