寨卡病毒殺埋身 後知後覺勢惹禍

港產官僚究竟點樣無心無肺？係咁嘅，衞生署衞生防護中心日前接獲內地通報，內地出現首宗外地傳入寨卡病毒感染個案，患者曾過境香港，照計應該引起港府高度重視至係o架，點知衞生部門居然唔肯公布詳情，只係粗略交代染病者係一名三十四歲男子，本月初乘飛機來港，喺機場逗留一晚後乘船返回深圳，至於航機及乘船資料就一律欠奉。食物及衞生局局長高永文仲死撐話患者只屬過境性質，病毒傳播風險相當低喎。

嗱，呢啲咪就係後知後覺囉。寨卡病毒搞到全球人心惶惶，家陣有染病者路過香港，港府居然輕描淡寫，問你怕未。有立法會議員促請當局追查病人留港期間行蹤，並公布有關航班資料，以釋公眾疑慮。喺民意壓力之下，當局尋日終於跪低，詳細交代病人行程資料，包括乘搭飛機同船嘅航班資料，以及抵港同離港時間等。當局仲急急補鑊，話已分別向有關航空公司及船公司跟進有關航機及船隻嘅滅蟲和病媒控制工作喎。

你話嘞，港府防疫幾兒戲吖。寨卡病毒殺到埋身，居然連向公眾交代詳情都懶，何止係無心無肺，直頭係無晒靈魂喇。正如有人話齋，提高透明度係防疫最基本嘅要求，市民對病疫情況知得愈多，防範能力就愈高，當局反其道而行，簡直就係靠害。當年沙士之所以喺香港急速擴散，就係因為有人隱瞞疫情，當局渾渾噩噩，市民唔知防範，卒之搞到疫情一發不可收拾。

見微知著，從今次事件就知道港府始終未能吸取教訓。深圳為咗處理今次事件，已即時加強口岸驗查，包括重點加強對來自病毒流行國家或地區人士、交通工具、行李同貨櫃等嘅檢疫監測；反觀港府慢條斯理，淨係象徵式將寨卡病毒列為需要呈報傳染病例，同深圳嘅防疫力度簡直蚊髀同牛髀。如果唔係今次漏報患者資料備受輿論關注，港府可能到依家仲係關人個關嘅咋。

一句講晒，寨卡病毒殺埋身，防疫寧緊不能鬆。香港家陣七國咁亂，萬一再爆發疫潮，想唔死都幾難吖，叮！