一不離二，二不離三，立法會尋日續會審議版權修訂條例，結果喺反對派拉布之下，又以流會收場。今次已經係短短兩個月內第三次流會，政客唔厭，市民都覺得煩喇。

即係咁，立法會烏煙瘴氣，拉布流會好似食飯咁，早已見怪不怪。建制派同反對派事後例牌互相指摘，互相卸責，其實計太一叮話齋，大家無謂再爭咯，五十步笑一百步，你話有咩意思呢？反對派拉布固然無聊，但只要建制派坐定定，又點會咁易流會吖。

當然喇，反對派全面不合作，無論大事或小事，政治或民生，任何議題都阻撓，任何條例都拉布，日以繼夜，夜以繼日，係人都頂唔順，所以呢，部分建制派議員無坐定定，都可以理解嘅。依家最大嘅問題係，繼續咁樣搞落去，立法會陷於癱瘓，港府乜都做唔到，社會停滯不前，豈不是齊齊攬住死？

其實，要防止沒完沒了嘅拉布及流會，本來唔係冇辦法，例如透過修改《議事規則》就可以，弊在修改議事規則需要獲功能組別同直選議員分組點票通過，喺今時今日嘅情況下，可以講係難如登天。

最好笑嘅係，激進政客仲懶咁風騷話唔係想流會，只係用一貫政策要求點人數，又話萬物有源有起，冇版權修訂條例就唔會出現流會咁話。嗱，呢啲咪就係風涼話囉，家陣立法會七國咁亂，就算抽起版權修訂條例，其他議題一樣受阻嘅啫，反對派唯恐天下不亂，根本唔會同你講道理，更加唔會同港府客氣。

話時話，版權修訂條例只係小事咋，就算過唔到，對社會影響亦唔大，最多係版權持有人利益受損。最令人擔心嘅係，財委會就快審議港珠澳大橋及高鐵工程追加撥款，如果過唔到就大鑊喇。港府話喎，如果高鐵追加撥款無法喺下月底前通過，就要被迫暫時停工，期間每月開支仍高達二點三億元，六個月計即係十四億元咁多，若工程爛尾，港府更要分別額外支付三十四億元及一百零六億元添。所以話，萬一兩項追加撥款被反對派拉倒，唔止成為國際笑話，而且係香港嘅超級災難，所有納稅人都要被迫埋單㗎。

冇法子喇，今時今日反對派政治掛帥，為反對而反對，為拉布而拉布，已經到咗走火入魔嘅地步，搞到香港內耗不斷，立會空轉，施政癱瘓，想唔死都幾難，叮！