廢鑊厚顏爭連任 過街老鼠人人打

事關最近有立法會議員踢爆佢出現喺港府招聘下一任平機會主席嘅名單上，係真係假，要睇過先知。大家有眼見，周一嶽近來動作多多，表現十分高調，好似近排就委託中大學者進行研究，話支持立法禁止歧視性小眾嘅人比十年前倍增，其中超過九成年輕人認為有需要立法，證明民意明顯轉變咁話喎。

正所謂司馬昭之心，路人皆見，周一嶽趷起條尾就知佢想點啦。民意係咪支持性歧視立法其實好難講，不過佢老哥臨下台仲咁風騷博到盡，唔使問阿貴，無非係博表現爭取連任之嘛。

話時話，如果周一嶽有真材實料，爭取連任係冇問題，問題係「廢鑊」臭名遠播，深入民心，佢嘅連任大計睇怕好難過到民意呢一關。呢，日前就有民間組織浩浩蕩蕩操去政府總部外集會，一邊狂數周一嶽僭越權責、挑起矛盾、濫用公帑等十宗罪，一邊高叫「若聘周一嶽，香港就大鑊」口號，可見「廢鑊」直頭係過街老鼠，人人喊打。

又難怪市民咁勞氣嘅，實在係周一嶽廢到無倫吖嘛。佢當年做食物及衞生局局長，搞到七國咁亂，天怒人怨，點不知港府有眼無珠，居然廢物利用，畀佢做平機會主席，結果佢繼續搞搞震作風，無事生非，有事生亂，短短幾年就將平機會搞到烏煙瘴氣，被冠以「歷來最受爭議嘅平機會主席」惡名，真係當之無愧。

第二樣唔講，就講佢最力推嘅性傾向歧視立法，就引起社會極大爭議，連湯漢主教都特登喺聖誕文告中強調家庭價值，好明顯係不滿周一嶽無風起浪，推動同性婚姻合法化，破壞傳統家庭價值啦。

一句講晒，神枱貓屎，神憎鬼厭，如果周一嶽稍有自知之明，應該及早告老還鄉，安享晚年啦，佢居然繼續戀棧官場，賴死唔走，唔怪得有人形容佢塊面皮厚過城牆。即係咁，周一嶽官癮大爭取連任係佢嘅問題，可唔可以連任則係港府嘅問題。一之為甚，豈可再乎，唔通港府嫌民怨唔夠大，想火上加油咩，叮！