「年，又過年，共慶歡樂綿綿。」話咁快又過年嘞，唔知大家辦好年貨未呢？嗱，今年辦年貨就抵咯，幾乎所有貨品都大劈價，要錢唔要貨咁滯。點解搞成咁？咪因為經濟差市民縮皮囉，商家有乜法子唔減價促銷吖。

到底點樣劈價？本報記者直擊發現，由糖果零食到海味藥材統統減價。好似最受小朋友歡迎嘅瑞士糖咁吖，去年賣五十元一盒，今年只售三十九元，足足平咗兩成。又好似拜年必備嘅曲奇餅，去年售一百二十元，今年一百元就搞掂。仲有呀，唔少舖頭實行多買多優惠策略，好似某名牌朱古力咁，買兩盒平五元，小數怕長計，慳唔少o架。

咁仲唔止吖，團年飯必備嘅海參、鮑魚、螺頭等海味最少減價一成，貴價藥材冬蟲夏草更減價一成半添，係咪抵到爛？至於其他傳統賀年食品例如瓜子、果仁、油器等等，即使來貨價上升，食品公司都唔敢加價，寧願賺少啲，當係年度大酬賓喎。

即係咁，對於零售業嚟講，一年之計在歲晚，食粥食飯全靠呢一鋪，平時加價就聽得多，減價幾乎聞所未聞。今年業界反其道而行，當然唔係益街坊咁簡單，實情係唔減冇運行，焗住咁做咋。正如海味店東主話齋，以前農曆新年前夕係最旺嘅日子，足以撐起全年業績，但近期經濟環境明顯轉差，唔少客人喺股市搞到損手爛腳，連辦年貨都就住就住，以前唔貴唔靚唔買，家陣就一百幾十元嘅貨色都要講價，唔減價根本吸唔到客，惟有薄利多銷囉。

話時話，零售業寒氣逼人，早就唔係新聞咯。好似剛過去嘅聖誕新年檔期咁吖，飲食業營業額錄得回歸以來首次下跌，同期舉行嘅冬日美食節以及工展會亦係旺丁不旺財。睇吓數字就知有幾慘情嘞，十二月零售業銷貨總值按年勁跌百分之八點五，係去年全年單月最大跌幅，至於全年跌幅更達百分之三點七，仲衰過沙士嗰陣時，唔驚就假。

冇計喇，近排金融市場風高浪急，內地同美國股市大起大跌，港匯轉弱不特止，仲撞正美國加息，本港樓市進入調整期，樓、股、匯齊齊告急，市民擔心隨時飯碗不保，自然撳實荷包，積穀防饑。嗱，「大笨象」滙豐銀行繼決定凍薪、凍招聘後，又傳凍結高層升職，今個猴年真係凍、凍、凍咯喂，叮！