今日係大除夕，送舊迎新，市面一片熱鬧，可惜有人歡喜有人愁，對於亞視員工嚟講，年尾流流無糧出，只能望天打卦，講起都可悲。

年尾流流慘被拖糧，亞視員工倍感徬徨。

即係咁，舊年亞視不獲港府續牌，大家以為好快玩完，點知拖吓一個月，拖吓又一個月，卒之拖到齊齊無糧出，連主要投資者都要入稟清盤，唔知好笑定好嬲。隨着員工甚至管理層紛紛跳船，亞視幾乎陷入真空狀態，連最基本嘅新聞報道都維持唔到，睇嚟今次真係凶多吉少，《亞視永恒》即將成為絕唱咯。

亞視前途未卜，最無辜係一班員工，部分人舊年十二月同今年一月嘅人工仲未有着落，有員工被迫引用《僱傭條例》向勞工處申請自動遣散；至於繼續留守嘅員工亦坦言打定輸數，過一日算一日，唔敢抱太大期望。

講真，亞視搞成咁嘅田地，資方絕對難辭其咎，員工有汗出冇糧出，點講都唔通喇。最離譜嘅係，有人不斷玩嘢，一時要求員工出糧時簽訂「借據」，債主反而變債仔；一時又話公司發展比出糧更緊要，總之拖得就拖，賴得就賴，唔到你唔服。

當然喇，一個巴掌拍不響，僱主固然唔抵爭，港府放任自流，亦要負好大責任。好簡單，一間電視台續牌被拒，毫無前景可言，想搵人投資都幾難，出現今日咁嘅亂局，早就係意料中事。之前亞視已經多次因欠薪被勞工處檢控及罰款，甚至有執行董事被定罪添，係人都知咁樣拖落去唔係辦法，監管部門居然仲好似事不關己咁，翹埋雙手隔岸觀火，你話係咪失職吖。

講開又講，大氣電波係寶貴嘅公共資源，港府當初收番個電視牌，都係因為亞視長期經營不善啫。好嘞，家陣牌就收咗，當局就關人個關，亞視好似無王管咁，搞到七國咁亂，員工怨聲載道之餘，市民一樣係冇得選擇，港府做啲唔做啲，簡直害人害物。點講都好喇，亞視「熄機」已成定局，依家最緊要係安頓好員工，令佢哋可以安心過年。

講起真係可悲，曾幾何時，本港影視娛樂事業興旺發達，創造無數奇迹，寫下無數輝煌，以致有「亞洲荷里活」之稱，估唔到家陣竟然淪落到連兩間免費電視台都養唔起。正所謂，一葉知秋，娛樂事業嘅沒落，正正係成個香港沉淪嘅縮影，再咁落去，香港遲早變番個小漁村都似，叮！