「成熟一項，推出一項」，係今屆政府上場時嘅承諾，初時係威係勢，可惜吖，由於官僚無能，施政混亂，搞到處處碰壁，結果變成「推出一項，跪低一項」，都唔知好嬲定好笑。

話口未完又衰咗嘞。港府去年公布尖沙咀海濱長廊擴建計劃，包括將星光大道大變身，揚言要打造成世界級旅遊景點，點知因為冇公開招標而引起爭議，有人甚至提出司法覆核添。喺滿城風雨之下，當局不得不跪低，宣布修訂有關計劃，原本打算興建嘅大型設施好似電影展覽館、觀景瞭望台同餐飲中心等全部取消，意味整個計劃胎死腹中。當局指最後決定採用簡約方案，係為咗回應主流民意喎，你話係咪阿Q精神吖。

老實講，擴建星光大道觸礁，一啲都唔奇怪。尖沙咀海濱係市民最熱門嘅休閒地點，星光大道更係本港最著名景點之一，擴建計劃本來無可厚非，點知當局無公開招標就匆匆推出，考慮不周，授人以柄，唔觸礁至奇喇。係人都知，今時今日香港乜都政治化，小事隨時變大事，大事隨時變風暴，港產官僚唔識吸取教訓，結果咪撞板多過食飯囉。難為當局仲話只係修訂計劃，唔使撤回喎，簡直係死雞撐飯蓋。

係人都知，星光大道已經啟用十幾年，唔止設施陳舊，景點更欠缺新意，曾畀外國傳媒評為全球十二個令人失望景點之一，認真丟架。如果星光大道能夠落實擴建計劃，增加設施，擴充容量，美化環境，提升競爭力，唔止市民多一個休閒地方，整個旅遊業亦可以受惠，甚至可以帶來唔少無形嘅收益，可惜官僚無能，好事變成壞事，問你服未。

最好笑嘅係，港府連擴建一條星光大道都搞唔掂，仲話要發展大嶼山、打造東大嶼都會等等，吹水就得。大家有眼睇，港府弱勢無能，施政寸步難行，大至國民教育、發展新界東北、政改方案、十年房屋大計，小至發展龍尾人工沙灘、小學TSA，有邊樣唔係跪低收場吖？

話時話，港產官僚大事做唔到，小事做唔好，搞到烏龍百出，點止星光大道淪為全球十二個令人失望景點之一，港府更加係全球最令人失望嘅政府。計太一叮話齋，反正星光大道擴建計劃拉倒，不如豎立一個庸官銅像，話唔定可以成為特色地標o架，叮！