經濟寒冬撲面 市民焗過瘦年

唔係講笑㗎。本報記者喺旺角街頭訪問五十名市民，近九成都話會減少新年開支，一半更表示會大減七成消費。而喺眾多支出項目裏面，最多人選擇喺飲食方面慳啲使，其次係衣物及旅行方面。市民勒緊褲頭過瘦年，節省開支，最少都講緊兩、三千元，多嘅甚至去到幾萬元添。

即係咁，對於零售業嚟講，一年之計在歲晚，食粥食飯就睇新春檔期，家陣消費者撳實荷包，業界想有運行都難。呢，有專賣年貨嘅店舖東主呻到樹葉落，話今年生意差咗四成，連以往大受歡迎嘅賀年糖果都銷情慘淡，搞到佢每晚都擔心到瞓唔着；服裝業亦唔好得幾多，有時裝店東主反映，以前過年啲客比較疏爽，家陣就一百幾十都要講價，簡直不可同日而語。

講真，零售業吹淡風，已經唔係今時今日嘅事咯。啱啱過去嘅聖誕檔期，飲食業營業額錄得回歸以來首次下跌，蘭桂坊餐廳門可羅雀，而同期舉行嘅冬日美食節以及工展會，亦係旺丁不旺財，部分參展商甚至損手離場添。

其實只要睇番統計數字，大家就唔會覺得驚奇嘅嘞。統計處最新數據顯示，舊年十一月零售業總銷貨值只有三百八十一億元，按年跌百分之七，而舊年頭十一個月嘅綜合跌幅亦達百分之三。業界對農曆新年市道亦打定輸數，預計較去年同期出現單位數跌幅。

當然喇，有頭髮冇人想做瘌痢，市民如果手頭鬆動，又點會左度右度，慳得就慳吖。大家有眼見，近排金融市場風高浪急，內地同美國股市動盪不安，港元匯價亦迅速轉弱，加上美國加息，本港樓市進入調整期，樓、股、匯三線齊齊告急，似足九七年金融風暴前夕。整體經濟前景不妙，市民擔心裁員減薪都嚟唔切，自然留多個錢積穀防饑，消費信心咪弱過藥材舖囉。

話時話，經濟危機殺到埋身，高官除咗大派定心丸，重彈本港金融體系成熟穩健等老調，似乎冇乜符弗。計太一叮話齋，試吓班官老爺扣薪兩個月，感受市民過瘦年嘅苦況，睇佢哋仲有冇咁老定，叮！