猴年伊始，天氣乍暖還寒，正值流感高峰期，一個唔小心隨時中招都有之，真係要小心保重身體呀。話時話，家陣嘅病菌之所以惡咗咁多，食極藥都好難斷尾，可能同濫用抗生素有關喎。

即係咁，自從英國科學家弗萊明喺一九二八年研發出全球第一隻抗生素「盤尼西林」後，人類同病菌之戰取得突破性發展，挽救咗大量人命，真係好偉大嘅發明嚟o架。不過凡事都有兩面，有利自然有弊，抗生素一旦被濫用，唔止唔可以殺菌，仲會催生具抗藥性嘅超級惡菌，救唔到人不特止，反而會累死人，家陣全球畜牧業及醫療系統濫用抗生素情況嚴重，連世衞組織都將呢個問題列為人類公共健康三大威脅之一，都咪話唔得人驚。

更弊嘅係，抗生素隨排泄物排到河流，會影響成個生態鏈，人類食咗受污染河水灌溉嘅農作物或河入面嘅魚類，抗生素就會自動過戶，進入人體，後果可大可小。呢，有學者首次針對本港河流嘅抗生素污染進行研究，喺新界錦田河、雙魚河、石上河、山貝河、蠔涌同埋梧桐河抽取樣本，結果不查猶自可，一查嚇一跳，超過六成樣本所含抗生素濃度有低至中嘅風險，唔止同污染嚴重嘅黃浦江及珠江流域打成平手，甚至比長江口高出六倍，問你怕未。

內地河流被污染得五顏六色早就臭名遠揚，香港竟然「青出於藍」，簡直恐怖。點解搞成咁？咪係成個港府渾渾噩噩，官僚冇做好監管所致咯。唔講唔知，原來本港至今未有一套抗生素排放規管標準，更加冇法例監管禽畜廢物排到河流等水體，環保署一味話大部分生活污水經污水廠處理後先至排出，抗生素水平十分低喎，根本係自欺欺人咋。

係人都知，畜牧業濫用抗生素已經好普遍，港大幾年前抽驗本港雞隻同埋豬隻，發現分別有八成八以及七成含抗藥性大腸桿菌，就知惡菌肆虐動物嘅問題幾咁嚴重喇。香港人食埋咁多抗生素，遲早連普通感冒都無藥可醫，打個噴嚏就一命嗚呼，咁就大鑊嘞。

一句到尾，香港話就話係安全城市，其實得個講字嘅咋。食品安全問題層出不窮，食水含鉛已經搞到市民怕怕，家陣連河水都唔安全，食條魚都可能出問題，簡直防不勝防。港產官僚對抗生素污染問題闊佬懶理，咁同攞市民條命嚟較飛有乜唔同吖，叮！