違規夜市無王管 屋邨淪為九反地
香港街頭小食馳名中外，蜚聲國際，連英國名廚都要慕名而至試食，都咪話唔巴閉呀。不過勢估唔到，流動小販嘅一串魚蛋居然成為磨心，引爆六七暴動以嚟最激烈嘅暴亂，幾乎反轉成個旺角，新年流流搞到「槍聲兩響除舊歲」，認真大吉利是呀。
係人都知，香港人最愛「掃街」文化，近年每逢農曆新年期間，旺角及深水埗附近一帶化身為小販天堂，特別係深水埗桂林街，做到成行成市，仲有「桂林夜市」嘅稱號添。今年春節，食環署派重兵駐守多個夜市黑點，無牌小販於是轉打游擊戰，攻陷各個公屋區，屯門良景邨及上水彩園邨更加係重災區，入夜後熟食車蜂擁而至，人聲鼎沸，分分鐘旺過台灣夜市。
以良景邨為例，多年來熟食小販阻街問題無日無之，經營範圍愈做愈大，唔止影響環境衞生，仲對治安構成威脅。唔係誇張，良景商場外直情係三不管地帶，更曾因擺檔問題爆發毆鬥，新春夜市淪為九反之地。冇計啦，鬼叫政府部門各自為政，執法時緊時鬆，有等於冇，點會唔七國咁亂吖。
其實學古人話齋，堵不如疏，桂林街夜市做到有聲有色，證明大眾市民對地區墟市有龐大需求。再講啦，近年店舖租金狂飆，基層創業愈來愈難，小販係從商嘅最低門檻，如果當局做好安置同規劃工作，制訂有效政策確保衞生同安全，例如夜市規劃，重發小販牌，唔止可以增加就業，亦為市民提供好去處，更可以增加本港旅遊景點，可謂一舉多得，何樂而不為呢？
可惜吖，港產官僚講就天下無敵，做就有心無力，即使捉到鹿都唔識脫角。咁多年來，墟市推出一個跪低一個，黃大仙騰龍墟係咁，上環大笪地係咁，天水圍天秀墟又係咁，最後都係慘淡收場。有人話港產官僚食嘢唔做嘢，做嘢打爛嘢，真係冇講錯!
最好笑嘅係，港府早前提議引入外國流行嘅美食車，原意本來係好嘅，問題係當中涉及消防、環保及交通等複雜問題，唔係短期內搞得成，加上預計入場費閒閒地要幾十萬元，唔止流動小販檔難以負擔，對想創業嘅年輕人嚟講，亦係「望車興嘆」嘅咋。
講到底，有頭髮冇人想做瘌痢，如果小商戶有生存空間，人人安居樂業，新正頭闔家團圓食大餐好過，鬼得閒年初一出來搵食咩？叮！
