俗語話，急驚風遇上慢郎中，意思係你急佢唔急。其實，遇上慢郎中唔係最可怕，最可怕係公立醫院七國咁亂，分分鐘冇病變有病，小病變大病，大病變冇命。

好似一一年九龍醫院發生嘅紗布封喉事故咁吖，害到病人窒息死亡，真係恐怖。呢，護士管理局近日就呢單奪命醫療事故展開紀律聆訊，傳召十二名涉事註冊及登記護士作供，成為歷來最大規模嘅聆訊。聆訊內容揭露有護士一直將死者嘅喉部永久造口，錯當臨時造口處理，紀錄又唔清唔楚，而醫生同護士居然一直冇發現問題，你話係咪荒謬吖。

話時話，公立醫院事故不斷，診錯症、開錯刀、打錯針、輸錯血，無日無之，無奇不有，呢單只係冰山一角咋。醫管局最新一期《風險通報》顯示，二○一五年第二季共呈報十一宗醫療風險警示事件，包括三宗病人術後醫療物料遺留體內，以及一宗錯誤分辨病人身份嘅治療程序，簡直係鑊鑊新鮮鑊鑊甘。

遠嘅唔講，伊利沙伯醫院婦產科最近一周就接連發生兩宗產婦接受刮宮手術被刮穿事件，其中一名產婦甚至懷疑連腸臟都刮穿埋，需要開腹檢查，雖然最後證實係虛驚一場，但無端端白捱一刀，都咪話唔大整蠱。

公立醫院本來係為港人提供醫療服務嘅「安全網」，唔止醫療設備先進，醫療水平亦一直名列亞洲前茅，點知近年問題多多，烏龍百出，「安全網」反而最唔安全，簡直係諷刺。點解會搞成咁？答案好簡單，就係因為醫管局管理混亂，導致資源錯配，前線人手不足，七個蓋冚十個煲，想唔出事都幾難。今年施政報告話就話預留二千億元，未來十年重建或擴建多間公立醫院，增加五千張病床，但正如立法會議員話齋，新增資源仍難以應付未來十年人口增加及老化帶來嘅需求，而且近半數新增病床集中喺將來嘅啟德醫院，而新增人口就集中喺新界區，呢啲咪就係資源錯配囉。

所以話，硬件固然要改善，軟件亦要配合，如果當局唔盡快解決前線人手不足嘅問題，就算點樣重建或擴建公立醫院，都係嘥氣嘅咋。

講起都幾無奈，近年香港好似撞邪咁，頭頭碰着黑，唔止整體競爭力跌跌不休，連醫療質素亦每況愈下，證明成個香港已經病入膏肓，再唔開刀根治，遲早玩完o架，叮！