香港七國咁亂，示威者愈來愈暴戾，前線警員經常成為重點招呼對象，愈來愈多人認為應該引入辱警罪。不過好在未立法咋，如果唔係，前保安局局長李少光分分鐘第一個中招都似。

呢，年初二凌晨旺角爆發大規模暴亂，磚頭橫飛，火頭處處，同戰場冇乜分別，特別係暴徒瘋狂襲擊前線警員，撳落地下猛砌嘅一幕，更加令全城一致譴責，其中身兼港區全國人大代表嘅李少光係咁講嘅，啲人見到狗跌落地下都唔會追打，更何況嗰個係人呢？

身為前紀律部隊阿頭，李少光撐警無可厚非，不過將警察同狗相提並論，聽落唔係撐警，反而似喺警察傷口上撒鹽多啲。係人都知，中國人對狗好唔公平，逢親說話帶「狗」字嘅，百分之百冇好嘢，「狗官」、「走狗」、「狗仗人勢」、「狗眼看人低」、「雞鳴狗盜」、「狼心狗肺」，無一例外都係鬧人。大文豪魯迅喺《論「費厄潑賴」應該緩行》裏面甚至講到明，如果同狗打交，唔單止要親手將佢打落水，之後仲要用竹竿繼續痛打「落水狗」。李少光呢番「落地狗」論，點止不倫不類，直頭公然辱警喇！

話時話，將警察比喻為狗，已經係反對派嘅悠久傳統。當年「六七」暴動，左派叫英國殖民地主子做「白皮豬」，而幫佢哋打工嘅華籍警察就係「黃皮狗」，以致有所謂「紅燒白皮豬，生炒黃皮狗」嘅口號，直到今時今日，嗰班口口聲聲話自己唔係中國人嘅激進分子，一樣秉承呢個傳統，喺街見到警察都會兜口兜面叫佢哋做「警犬」。至於李少光同反對派同聲同氣，到底有何居心，睇怕只有佢自己先心知肚明嘞。

點都好啦，旺角暴亂一役，港府高層推卸責任加上指揮失當，前線警員要裝備冇裝備，要人手冇人手，要策略冇策略，結果淪為人肉沙包，折損慘重，已經㷫過辣雞，一哥事後高度讚揚前線警員全世界「表現最克制」，更加搞到前線媽媽聲。喺呢個風頭火勢嘅時候，好心出少句聲當幫忙，個嘴快過個腦，山草藥噏得就噏，竟然拋出「落地狗」論，盞火上加油，添煩添亂嘅咋！

正所謂強將手下無弱兵，弱將手下無強兵。當年曾爵士一句「狗噏」已經語驚四座，估唔到佢啲手下更加係青出於藍勝於藍，呢啲咪就係物以類聚，人以群分囉，叮！

第一手消息請下載on.cc東網iPhone/iPad/Android/Windows Phone Apps