恭喜發財！今日係大年初一，太一叮喺度恭祝大家猴年好景，萬事勝意，龍馬精神！

冇錯嘞，健康就係最大嘅財富，事關有健康嘅身體先可以拚搏向前，唔理係真寒冬定經濟寒冬，都一律冇有怕喇。呢，本港正值冬季流感高峰期，加上前排寒潮襲港，搞到唔少市民中招，幼童同長者更加係高危群組添。早前多間幼稚園同小學爆發流感，部分甚至一日就有百幾人請病假，要提早放年假，都咪話唔誇張。當局數字顯示，一月底至二月初短短一個星期內，公私營醫院錄得十二名成人因流感而需要接受深切治療，其中一人死亡。所以話，咪睇小流感嘅殺傷力吖，大吉利是講句，隨時爆大鑊㗎。

屋漏偏逢連夜雨，流感高峰期未過，寨卡病毒又來勢洶洶。港大微生物學系講座教授袁國勇係咁講嘅，根據登革熱傳播嘅經驗，香港存在被寨卡病毒入侵嘅風險，只要病毒傳到包括內地在內嘅整個東南亞地區，香港就有機會出現感染個案。查實寨卡病毒早就攻陷泰國喇，仲成為風土病添，當地同香港只係咫尺之遙，加上唔少港人鍾意去泰國度假，睇怕香港都幾難獨善其身。

疫情當前，港府話就話知道事態嚴重，急急將寨卡病毒感染列為法定呈報傳染病，但淨係咁未必夠㗎。你知喇，港產官僚向來防疫粗疏，把關甩甩漏漏，以前就算拍晒心口話做足預防措施，一樣被沙士、禽流感、豬流感等長驅直入，何況依家防範寨卡病毒只係象徵式？香港家陣已經七國咁亂，萬一再爆發疫症，想唔亂上加亂都幾難。講開又講，當局嘅滅蚊工作一直被批評成效不彰，埋下隱患，萬一等到病疫攻城掠地至嚟補鑊，咁就真係蚊都瞓咯。

所以話，恭祝大家身體健康唔係純粹講意頭，而係有實際需要。講多樣嘢畀大家聽吖，由於流感當道，公立醫院早前又被逼爆，十五間設有內科病房嘅醫院之中，十三間出現人滿之患，整體平均使用率達百分之一百一十一，其中最嚴重嗰間更加去到百分之一百二十四，問你點頂。公立醫院本來就面對前線醫護不足嘅問題，十個茶煲七個蓋，家陣連病床都唔夠，直頭雪上加霜，莫講話寨卡病毒，就算普通流感爆發都頂唔順喇，吓話！

一句講晒，新年伊始，挑戰多多，再次恭祝大家財源廣進，龍馬精神！