新年新願望，為祈求今年行大運，有人去黃大仙祠祈福，有人去大埔林村許願樹掟寶牒，亦有人會去車公廟求番支靈籤，總而言之各適其適，總有一款啱你心水。講到底，許願呢家嘢信則有不信則無，至緊要都係夠誠心，正所謂心誠則靈吖嘛。

當然喇，話就話成事在天啫，但係謀事始終在人，特別係如果想「借庫」嘅話，除咗拜託觀音娘娘，最正路都係搵特區政府。呢，有團體尋日操上政府總部，向財政司司長曾俊華拜年，當中有身穿靈猴服飾嘅小朋友向財爺逗利是，希望即將出爐嘅預算案可以回應民生訴求，包括推出多項即時紓困措施，如減免差餉、增發一個月綜援及生果金，以及重推電費補貼計劃等。佢哋又向鬍鬚曾奉上道具金元寶，希望佢唔好再做守財奴。

正所謂冤有頭，債有主，市民呢鋪真係搵啱對象嘞！記得幾年前立法會通過動議，促請港府善用龐大盈餘，與市民分享經濟成果，當時鬍鬚曾就形容自己好似一棵「豐滿」嘅許願樹。所以話，今次市民淨係請願，冇兜口兜面向佢掟寶牒，都算畀足面(o架)嘞！

講開又講，港府庫房連年水浸，肥到着唔到襪，如果話當年鬍鬚曾係一棵「豐滿」嘅許願樹，今時今日睇怕都算係「癡肥」嘅許願樹咯。唔係咩，鬍鬚曾預測本年度財政盈餘係三百六十多億元，結果又錯到離譜，綜合會計界預測，本年度財政盈餘預料將達七百多億至九百多億元，港府財政儲備水漲船高，達到八千五百多億元，相當於政府二十四個月開支，鬍鬚曾年年預算變失算，知唔知醜字點寫(o架)。

難為鬍鬚曾仲為自己解畫，話預測收入來源比預測支出困難好多喎。喂，預測同實際有出入係無可厚非，但都唔可以差到十萬八千里(o架)。唔怪得有人話，鬍鬚曾身為香港大掌櫃，數口連小學生都不如。嗱，估錯數呢一筆暫時唔講，市民依家最關心嘅係，到底政府會點用呢筆意外之財？鬍鬚曾係咁講嘅，會因應經濟情況加以考慮，呼籲大家畀啲耐性咁話，總之就一味遊花園啦。

港府繼續一毛不拔抑或開倉濟貧，今個月廿四號財政預算案公布自有分曉。話時話，港府拒絕善用庫房解決全民退保等大問題，至少都要派糖等市民甜吓個嘴，今年經濟不景加上民怨沸騰，鬍鬚曾唔好火上加油吖，叮！