正所謂，斷人衣食猶如殺人父母。呢嗱，反對派政客正正係斷人衣食嘅殺人兇手嘞。冇冤枉o架，多得佢哋不斷喺立法會拉布流會，搞到工程議案大塞車，點止影響工人生計咁簡單，直情拖累各行各業，遲早搞死香港。

面對呢班「殺人兇手」，發展局局長陳茂波忍唔住有感而發，話港府原本預備今個年度向立法會工務小組委員會提交七十二個工程項目，總額達六百七十五億元，點知反對派政客阻頭阻勢，工務小組至今只係討論咗五個項目，財委會亦只批出兩個項目，涉及款項只有五十六億元咁大把，擔心再咁拖落去，建造業「一時飽死，一時餓死」，咁就大鑊嘞。

冇錯嘞，工程項目遲遲未能審議，工程成本大幅上升不特止，青年宿舍、醫院及體育館等惠民項目亦落成無期，你話係咪累人累物吖。陳茂波話喎，為咗更有效控制建造成本，計劃設立專責辦公室。咪話潑冷水吖，政治生態一日不改，反對派一日搞搞震，當局開設幾多個辦公室都係無濟於事嘅咋。

大家有眼見，立法會財務委員會日前馬拉松式審議港珠澳大橋追加撥款申請，雖然主席最終成功剪布，趕及「死線」前通過追加撥款，但反對派大鬧議事廳，又擲物又衝出主席台，仲趕極唔走添，場面亂過六國大封相。港珠澳大橋追加撥款只係涉及五十五億元左右，已經要出盡九牛二虎之力、耗費接近三十小時審議至勉強過關，涉款更巨嘅高鐵工程追加撥款申請，點會唔硬仗連場吖。拉布議員已經講明必定全力狙擊高鐵項目，到時又會亂成點，真係冇眼睇咯。

正如港鐵主席馬時亨話齋，高鐵工程涉及七千多名工程師及工人嘅生計，萬一今個立法年度未能通過申請，就要喺新一屆立法會推倒重來，除咗影響建造業，亦拖累物料供應、採購、物流等相關行業。反對派自私自利，為咗政治目的，不斷採取拉布流會戰術，打爛工人飯碗在所不計，唔通真係唔怕有報應嘅？再講吖，如果工程項目拖到下一屆立法會先至一窩蜂上馬，隨時出現人手不足，到時唔慌唔係「一時飽死，一時餓死」咯。

所以話啫，反對派呢班人形垃圾充斥立法會，香港想有運行都幾難，除非九月份立法會選舉，選民運用手中一票將呢班搞事分子統統掃地出門喇，叮！