街招黨無法無天 第四權豈容打壓
傳媒嘅職責係監察政府運作及官員操守，同埋報道社會真相特別係揭露各種陰暗面，所以被稱為第四權。東方報業集團正正係發揮第四權監察力，仗義執言揭發黑幫和勝和前坐館「上海仔」各種罪行，點知反遭惡意報復，連集團高層亦被貼街招抹黑，你話香港仲有冇法紀吖？
即係咁，貼街招恐嚇已經唔係乜嘢新聞，大家早就見慣嘅喇，問題係近年黑幫變本加厲，居然肆無忌憚恐嚇勒索多名富豪，問你怕未。香港假假地都係法治社會，黑幫橫行霸道，目無法紀，唔通真係和尚打傘，無法無天？
正如多名立法會議員及行政會議成員質疑，黑幫以貼街招方式勒索，公然挑戰法治，萬一成為一股風氣及常態，必定永無寧日，當局絕對唔可以輕視，必須盡快破案。
記者出身嘅立法會議員劉慧卿就講得啱嘞，傳媒嘅存在就係要公平、公正報道社會事件，如果因為獨立報道被針對，唔止令人齒冷，好明顯係損害新聞自由喇；黑幫公然挑戰法治，如果任由呢股歪風蔓延，「好似金礦咁，今日搞你，聽日搞佢，香港咁多有錢佬，逐個搞咪隨時賺幾億？」
正所謂，公道自在人心，另一名立法會議員陳偉業亦炮轟以貼街招方式進行勒索，行為極之猖獗，當中好明顯有黑社會或社團背景，傳媒揭露後仲肆無忌憚，不斷重複咁做，完全當法治無到。
咁又係吖，黑幫嘅所作所為，唔止係打壓新聞自由，直情係挑戰成個社會。唔好以為貼街招勒索係小事吖，正如法律界人士指出，如果有人以貼街招作為恐嚇、勒索嘅手段，張貼街招者隨時會干犯串謀勒索罪，最高可以判囚十四年o架。
冇錯，喺傳媒持續報道及社會廣泛關注下，警方終於正視問題，連日來追剿「貼街組」，日前仲成功搗破旺角一間街招印刷工場，將成條生產線連根拔起，拘捕上海仔旗下五名骨幹成員，總算做咗啲嘢。不過咁，打蛇打七寸，擒賊先擒王，要打擊黑幫氣燄，杜絕呢股歪風，淨係拉幾個嘍囉小卒係解決唔到問題嘅，最緊要揪出幕後黑手，依法懲辦，至可以殺一儆百。
黃台之瓜，何堪再摘。香港本來已經烏煙瘴氣，七國咁亂，如果當局繼續坐視黑幫為所欲為，唔止新聞自由危危乎，成個香港隨時淪為「勒索之都」都似，叮！
