本港早前歷經五十九年來最凍嘅寒潮，氣溫稍為回暖，忽然寒流再襲。其實，寒潮不斷嘅點止天氣吖，本港旅遊業一早進入寒冬，嚟緊農曆新年期間更加雪上加霜，分分鐘凍過大帽山頂添呀！

嗱，入境處數字顯示，去年內地客入境人次只有四千五百六十二萬，下跌百分之二點九。有旅遊業界估計，農曆新年期間旅業衰多兩錢重，內地入境團比去年同期再急跌三至五成，搞到旅行社嗌晒救命，員工要無限期放無薪假添，都咪話唔大鑊呀。

講起都閉翳，去年酒店業整體入住率已經唔多掂，業界本來打算趁春節旺季加價三成，諗住可以好天斬埋落雨柴，點知形勢惡劣，如意算盤打唔響不特止，隨時要再劈價吸客都有之。面對呢個困局，有酒店不甘坐以待斃，紛紛絞盡腦汁，奇招百出，好似為小童提供免費住宿及早餐優惠，又研究為短途旅客提供大型活動免入場費等等，務求逆境求存，捱多一日得一日。

正所謂，冰凍三尺，非一日之寒，前排中國城市競爭力研究會公布最具特色旅遊城市排名，香港三十大不入，真係失禮死人咯。其實唔係冇原因嘅，大家有眼見㗎，景點設施十多年如一日，來來去去得個海洋公園同迪士尼樂園，早就滿足唔到旅客需求，莫講話玩吖，齋聽都覺得厭啦。最離譜嘅係，香港劏客醜聞不絕於耳，甚至發生旅客被毆斃慘劇，再加上激進組織一時驅蝗，一時光復，港人又想賺錢，又要趕客，簡直係精神分裂，如果你係內地客，都唔會嚟香港貼錢買難受啦。

反觀鄰近地區就唔同嘞，唔止當中國旅客係財神咁拜，優惠更推陳出新，措施一浪接一浪。以南韓為例啦，為咗刺激外國旅客消費，今個月起引進市內小店即時退稅服務，旅客唔使再喺機場大排長龍辦退稅，濕平都爽手啲啦。

香港坐困愁城，港產官僚一味翹埋手等運到，話就話要急救旅遊業，所謂救亡措施，原來就係喺灣仔金紫荊廣場附近打造動漫樂園。唔係啩，以為戙幾個公仔塑像就當係做咗嘢，與其有姿勢冇實際，不如放幾隻招財貓冇咁嬲啦。

黃台之瓜，不堪再摘。香港頭頭碰着黑，樣樣都唔掂，旅遊業敲起警鐘，其他行業亦唔慌好得去邊，當局再唔做啲嘢，香港唔止寒冬咁簡單，遲早步入冰河時期都似，叮！