「冷得我騰騰震，真係震到入心」，呢首舊歌唱到街知巷聞，成為港人嘅集體回憶，估唔到今日真係應景。近日寒流席捲全球，唔止美國受到百年不遇嘅怪獸風雪吹襲，中國氣溫亦持續急降，大陸固然普遍降雪，連台灣山區都出現飄雪奇景，寶島變成冰島。

香港亦唔好得幾多，同樣凍到入骨，除咗氣溫跌至近年新低，而且有霜凍警告，有網民更聲稱拍到疑似飄雪添。係人都知，天寒地凍最容易引發呼吸系統疾病，搞到公立醫院紛紛逼爆，加上流感高峰期就快殺到，大家最緊要自求多福，保重身體吖。

即係咁，無論天氣點凍，都係暫時嘅啫，寒流過後總會回暖，最令人不寒而慄嘅係經濟前景，尤其係隨住旅遊業進入寒冬，零售等相關行業亦齊齊無運行，整個市道一片冰冷，冇人知道幾時至可以出現陽光。大家有眼見，市面冷冷清清，唔少商場十室九空，人流疏落，有人警告農曆年後可能出現企業結業及裁員潮，諗起都閉翳。

唔係危言聳聽㗎，外圍環境陰霾密布，金融市場風高浪急，內地固然多次出現熔斷停市嘅震撼，美國股市亦持續急跌，香港首當其衝，唔止樓市跌、股市跌，連匯市亦跌跌不休，港元匯價一度創下八年多新低，簡直係風聲鶴唳，哀鴻遍野。此情此景，令人諗起當年亞洲金融風暴嘅慘狀，萬一歷史重演，你話點算呢？港府有冇能力應付呢？

呢嗱，國際貨幣基金組織預測本港今年經濟增長百分之二點五，連財經事務及庫務局局長陳家強都唔敢樂觀，直言要達到呢個數字有相當大嘅挑戰喎。咁又係吖，早前有金融機構預測本港今年經濟增長只得百分之一咋，萬一有乜風吹草動，分分鐘連百分之一都保唔住添吖。

話時話，過去香港遇到經濟危機，仲有內地可以依靠，可惜今時唔同往日，家陣內地經濟形勢嚴峻，自顧不暇，就算想照顧香港，都無能為力喇。更何況，中港矛盾不斷惡化，連方便市民嘅高鐵「一地兩檢」都被視為洪水猛獸，中央又點樣伸出援手吖。

凡事豫則立，不豫則廢，香港面臨內憂外患，如果當局仲係不思進取，只會坐以待斃嘅咋。講到底，天寒不及經濟寒，市民固然要注意保暖，港府更加要採取禦寒措施，否則隨時路有凍死骨都似，叮！