古人教落，危邦不入，亂邦不居，真係一啲都冇講錯o架！大年初一旺角暴亂，旅客當堂嚇到鼻哥窿都冇肉，新春期間內地訪港團比舊年大跌七成，真係打針都冇咁快見效。

當然喇，香港愈來愈暴戾，家陣仲打埋巷戰，十足十伊拉克戰場咁款，直頭生人勿近，點止嚇走旅客咁簡單吖。呢，大笨象滙豐控股近排討論總部遷冊，之前一直傳聞可能會重回香港，點知有英國傳媒報道，滙控最終選擇將總部留番喺倫敦，預計喺公布業績前交代有關決定。

話時話，呢個消息嚟得都幾突然。據傳滙控遷冊考慮過多個地點，除咗香港，仲考慮選擇紐約同巴黎作為總部選址，不過巴黎啱啱經歷恐怖襲擊，至於紐約，亦因為課稅安排等問題，令滙控有所顧慮。反觀亞洲市場近年發展迅速，公司大部分盈利來自亞洲，所以一般都認為回歸香港嘅機會大啲。家陣突然轉風向，而且唔遲唔早，偏偏喺旺角暴亂之後傳出，到底當中有咩玄機，相信畫公仔唔使畫出腸喇啩。

又難怪嘅，做生意最緊要和氣生財，一個社會終日吵吵鬧鬧，七國咁亂，幾多商機都係假。有辦你睇，南美洲同非洲唔少國家自然資源夠豐富喇，弊在局勢亂過亂世佳人，三日唔埋兩日政變，再唔係就內戰，投資隨時化為烏有，係人都怕怕。香港雖然未去到咁不堪，但內鬥內耗愈來愈嚴重，係不爭嘅事實，特別係前年佔領之亂，唔單止成個社會癱瘓咁滯，仲令到違法抗爭等歪風好似癌細胞咁不斷擴散，最終更演變成街頭暴亂。查實佔領期間已經有人擔心投資者撤資，結果不幸言中，就喺佔領後冇耐，本地華資龍頭企業大規模重組，被外界形容變相出走，問你怕未。

大家有眼睇，近年香港競爭力好似食咗瀉藥咁，國際排名跌跌不休，主要就係因為一味掛住內鬥內耗，搞到原地踏步。好似世銀舊年發表嘅國際營商環境報告咁吖，本港喺建築批則程序等多項關於效率嘅得分都大不如前，搞到排名由第三跌至第五。鬼咩，淨係睇吓立法會班政客，唔係拉布就係流會，大型基建寸步難行，仲講咩效率吖！

講起真係好笑，有啲人開口埋口冇民主就冇民生，講到政治可以當飯食咁。太一叮真係好想問吓佢哋︰再咁亂落去，投資者紛紛棄港而去，到時香港變番小漁村都似，叮！