大件事!港深邊境隨時爆發槍戰!唔係政治原因,唔關偷渡走私,只因港府以鄰為壑,侵擾深圳居民,講起都唔知好嬲定好笑。

件事係咁嘅。港府舊年開始分階段縮減沙頭角及落馬洲部分禁區土地面積,警方因而喺落馬洲近深圳河邊新建一道五點六公里長嘅邊界巡邏路及圍網,並設置照明系統,話要防止有人經深圳河偷渡喎。點知港產官僚自以為是,懶理對岸居民,卒之搞出個大頭佛。

即係咁,邊境禁區安裝照明系統本來好正常,弊在港府做法唔正常,成排強光直射對岸民居,通宵燈火通明,而且愈夜燈光愈強,落埋窗簾都唔掂,搞到深圳河沿岸多幢住宅嘅居民冇覺好瞓,過千戶人受影響,投訴無門,真係佛都有火。

有位深圳居民警告,如果港府繼續闊佬懶理,唔解決光污染問題,唔排除開槍開炮將燈柱射毀。你話喇,兩地係咪隨時爆發槍戰吖?又難怪人哋咁o架嘅,當今世界提倡以鄰為善,港府就以鄰為壑,為咗方便自己,完全唔理人哋嘅感受,唔就假,正一佛都有火喇,叮!

其實,就算唔係強光擾人,港府嘅做法都浪費能源喇。潮流講環保節能,當局成日將環保口號掛喺嘴邊,實際上逆潮流而動,大搞「跨境」光污染,損人不利己,簡直九唔搭八。

係人都知,近年中港矛盾持續緊張,兩地民眾嘅摩擦愈嚟愈多,家陣又搞出強光滋擾深圳民居醜聞,無端端激化矛盾,簡直係火上添油,唔衰攞嚟衰。

再講喇,今時唔同往日,隨着內地經濟高速發展,港深生活水平愈嚟愈接近,偷渡活動幾乎絕迹,仲使唔使咁大陣仗呢?正如有位深圳居民話齋,依家內地生活條件比香港好,邊有人再偷渡去香港吖,整咁多燈射住邊境根本係多餘。

一般嚟講,只有以前嘅監獄先至會用強燈射向犯人,咁做根本就係一種侮辱,如果深圳嗰邊同樣用強光侵擾香港居民,港人又有乜反應吖。

正所謂,泥水佬開門口,過得人過得自己。試諗吓,如果發生旱災,內地閂閘停止東江水供港,試問港府又點做呢?己所不欲,勿施於人吖,叮!

第一手消息請下載on.cc東方互動iPhone/iPad/Android/Windows Phone Apps