亂扣錢秘而不宣 八達通超級搵笨
時代進步，今時今日嘅八達通唔止可以當車票，仲可以當錢買嘢，功能就好似一個電子錢包。嗱，既然係錢包，梗係要好好管理啦，偏偏八達通公司烏厘單刀，搞到成個系統千瘡百孔甩甩漏漏，問題百出醜聞多多，市民成日蒙受金錢損失，真係畀佢激到「嘟」一聲。
嗱，八達通公司又引爆醜聞，承認八達通存在交易陷阱，如果拍卡太快，交易可能未完成已經被扣錢，簡單講，即係市民隨時會被搵老襯。
有冇搞錯呀？八達通係流通電子貨幣，關乎全港市民嘅荷包，點能夠咁兒戲o架？正所謂小數怕長計，雖然八達通一般交易金額唔大，但係日日被人打斧頭，嘟吓扣錯幾蚊，嘟吓扣錯幾蚊，條數好襟計啫。八達通系統甩甩漏漏，搞到市民荷包穿窿，簡直離晒大譜！
更離譜嘅係，八達通公司一早就知道有呢個交易陷阱，但係一直秘而不宣，咁即係掘個窿畀市民踩啫。嗱，○九年至今，總共有七十八萬宗未完成交易，涉及七百七十萬元，當中逾半屬非個人八達通卡用戶，全部無獲退款，部分人仲已經退咗卡添，根本追討無門，涉及金額總數超過四百萬元，而且仲未計○九年之前嘅未完成交易，估計多收金額達五百二十萬元。
八達通系統錯漏百出，已經得人驚o架啦，出現問題之後仲要秘而不宣，全港市民被蒙在鼓裏，咁搞法，以後仲有人相信八達通嘅？喂，八達通系統出錯唔係第一次o架嘞，早年已經被人踢爆易辦事增值變「易出事瓜直」，客戶又係被扣咗錢而不獲確認，涉及金額總數三百七十萬元。機器係死嘅，人係生嘅，八達通最大股東係港鐵，而港鐵嘅最大股東又係港府，咁就等於官老爺間接推市民落交易陷阱，即使唔係存心掠水，起碼已經嚴重失職喇！
即係咁，八達通，穿晒窿，八達通內部管理千瘡百孔，隱瞞客戶嘅何止係扣錯錢吖。大家應該記得，八達通出賣客戶個人資料牟利四千幾萬元，市民又係被蒙在鼓裏，客戶又係做咗老襯，港府又係監管失職。開講都有話啦，一次不忠，百次不用，八達通前科纍纍，唔係接二連三系統出錯，就係三番四次欺瞞客戶，如果唔加強監管，市民嘅荷包邊有保障呀？
咁講啦，港府監管八達通公司亦係一項未完成交易，市民納咗稅畀政府，政府居然無貨交，再咁落去，信唔信市民遲早同政府取消交易吖嗱，叮！
