跨境學童年年增 返回機制難治本

小學統一派位啱啱公布，今年本地小一學生加埋跨境學童，人數激增四千，結果只有六成八獲派頭三志願，創多年新低，唔怪得好多家長失望喇。咁都唔緊要，最慘係唔少北區小一學童被迫跨區返學，雖然當局引入所謂「返回機制」，但仍然無法消除家長疑慮，隨時添煩添亂嘅咋。

係人都知，隨着跨境學童年年增加，北區學位嚴重短缺，家長早就怨聲載道。教育局話，會畀派咗去大埔嘅學童選擇返原區就讀，免受跨區返學之苦，美其名曰「返回機制」；區內學校同時亦會加收學生，無論大班定小班教學，新學年小一將劃一調升至每班三十三人。

可惜，對於呢個所謂返回機制，好多老師同家長都唔睇好。梗係喇，北區新增學額主要分配到村校或部分弱勢學校，分分鐘愈派愈差，到時大埔冇位，北區又唔啱心水，隨時變成兩頭唔到岸，家長唔擔心就假。正如北區小學校長會負責人話齋，無論統一派位定返回機制，區內學生獲派心儀小學嘅機會大跌，相信會引發大批家長四出叩門。

其實講嚟講去，今日呢個進退兩難嘅亂局，完全係曾蔭權爵士留低嘅蘇州屎。前朝政府中門大開，對雙非孕婦無任歡迎，過去十年喺本港出生嘅雙非兒童累積多達廿萬，當局預料大約一半會回流本港讀書，其實純粹靠估，真正嘅回流數字根本冇人知。近年跨境學童不斷增加，北區學額愈來愈緊張，當中唔少就係雙非兒童，你話係咪靠害吖。

前朝政府胡混度日，埋下炸彈，雙非及跨境學童人數不斷飆升，北區小學早已人滿為患，當局束手無策，一味頭痛醫頭，腳痛醫腳，年年都係靠加班、加人、抽籤、借學額呢啲權宜措施虛應故事，根本解決唔到問題，搞到學生同家長年年疲於奔命，無所適從。貪曾禍港，莫此為甚。

返回機制原意係畀家長同學生多一個選擇，弊在北區學額短缺問題積重難返，就算今年勉強應付過去，明年點辦？後年又點算？年年返回，究竟要返到幾時呢？咪話太一叮唔提醒，隨着雙非兒童陸續進入適學年齡，跨境學童只會愈來愈多，淨係靠挖東牆補西牆，根本唔係治本之道。解鈴還須繫鈴人，呢個問題係港府搞出嚟，自然要由港府解決，叮！