東江水質惡化 一味識得加價

東江水係港人主要食水來源，水質一直令人詬病，依家嘅情形又點呢？東方報業為港人把關，分別喺東江下游東莞太園泵站、香港船灣淡水湖及藍田公屋自來水抽取樣本化驗，結果可以用「觸目驚心」嚟形容。

呢嗱，太園泵站嘅原水樣本，重金屬鐵含量高達每公升零點四八毫克，超出內地標準六成，渾濁度高出世衞飲用水標準兩倍有多。望吓周圍環境，就明白點解污染物爆燈嘞。河道除咗有工程船來來往往，處處垃圾漂浮，仲有人游水添。本港境內嘅船灣淡水湖情況亦唔好得去邊，死魚同死龜隨處可見，大量水藻發出陣陣臭味，唔怪得渾濁度同樣超出世衞標準喇。

水質惡劣唔講得笑，正如學者話齋，人體吸入過量重金屬，器官功能受影響不特止，仲可能致癌；食水渾濁度愈高，經過過濾同消毒後，殘存「漏網之菌」嘅機會愈高，好容易病從口入。

東江水佔本港供水量逾七成，水價年年加，但水質無改善不特止，仲不時被踢爆受污染嘅醜聞。呢，深圳水庫舊年被揭發河涌遍布糞便同死老鼠等垃圾；而供港東江水途經嘅廣東新豐江水庫，亦被踢爆有企業違規採礦，將含化學物質嘅污水直接排入水庫，加上沿岸違規開設嘅旅店及食肆胡亂排放糞水及廚餘，搞到生命之源變禍害之源，叫港人點飲得放心吖！

今時今日嘅神州，沒有最恐怖，只有更恐怖。除咗工業廢水直接排放，連死雞、死豬，甚至死人都可以揼落河。繼上海黃浦江漂滿過萬隻死豬，湖南衡陽湘江河面更發現多具嬰兒屍體，同胞唔止被迫飲「豬肉湯」，仲隨時飲到「人肉羹」，問你驚未！

講番東江水，港人真係好無奈，每年水價接近四十億港元，明年協議到期，又唔知要加幾多。內地當局淨係識得加價，改善水質就關人個關，仲話血濃於水，錢濃於水就真。計太一叮話齋，北大人如果想香港人心回歸，最有效一招就係先從食品及食水安全做起，嚴懲謀財害命嘅奸商及助紂為虐嘅貪官，等港人食得安心，飲得放心，做個堂堂正正、健健康康嘅中國人，如果唔係，講乜都假，叮！