政壇：Greg蘇去完法國又訪美

立法會下月中先放暑假，但立法會主席曾鈺成就趁下星期端午節假期休會一日，下星期一帶埋秘書長陳維安到訪英國國會五日。難得休會可以畀自己耳根清淨吓，佢今次肯定未出發先興奮。除咗議員，冇得放暑假嘅問責官員都排緊隊起飛，好似商務及經濟發展局局長蘇錦樑（Greg蘇）咁，早幾個星期飛咗轉法國同比利時後，聽日又跟特首走多轉美國精華遊，五日直踩紐約、三藩市同洛杉磯三個城市，認真和味！Greg蘇被喻為外訪次數最多、開支最高嘅問責官員，今次一飛就一個星期，連同隨行人員相信又唔知燒幾多公帑。