立會大樓豆腐渣 貪曾遺禍水長流

呢個港版豆腐渣工程就係立法會新大樓。話說其中一個位於十樓嘅議員辦公室離奇起火，自動灑水系統成功救熄火種，不過火災撲滅，水災爆發。由於大樓內部並無防水設計，積水翻江倒海一直由十樓浸到落六樓，多達十四名議員嘅辦公室被波及。有啲天花板滲水，有啲櫃桶變水桶，有啲電腦報銷，有啲地板變水塘，你都咪話唔誇張。

因為一場小火，立法會大樓搞到滿目瘡痍，真係講都無人信。建築界議員係咁講嘅，灑水系統一般只會波及三個樓層，連浸五層十分罕見，懷疑窗台駁口位同電線管道「做得唔係咁好」，所以先至畀水患有隙可乘。

五年前一場「五一二」汶川大地震，豆腐渣樓房奪去無數寶貴生命，諗唔到五年後嘅「五一二」，一幢豆腐渣立法會大樓將香港嘅形象土掩活埋。立法會假假地都係香港憲制權力象徵吖，立法會大樓甩皮甩骨，甩甩漏漏，香港乜架都丟清啦。警方話會調查起火原因，其實計太一叮話齋，佢哋更應該調查一下點解好好一幢立法會大樓會千瘡百孔，淪為豆腐渣工程？

其實唔查都知，立法會大樓淪為豆腐渣，罪魁禍首咪就係前特首曾蔭權爵士囉。貪曾好大喜功，死都要卸任前最後一份施政報告喺立法會新大樓宣讀，監粗要求趕工交貨，結果埋下隱患，禍水長流。呢，本報曾經獨家踢爆，立法會綜合大樓淪為毒氣室，室內充斥有毒物質TVOC，令一眾男女議員陷入不育同生癌危機，你話貪曾係咪害人害物吖！

講開又講，喺貪曾嘅腐敗管治之下，豆腐渣嘅何止一幢立法會大樓，其實成個「門常開」新政府總部都係啦，又被退伍軍人症桿菌攻陷，又被小偷光顧，又爆水管水長流，又路不平跣親人，門常開實為禍常來，香港想唔死火都難！

簡單咁講，貪曾七年執政徹頭徹尾就係一個豆腐渣工程，搞到香港嘅基業日積月累牆崩瓦裂。最大鑊係貪曾遺禍無窮無盡，比立法會大樓嘅積水更加綿綿不絕，點都清理唔晒。你話嘞，如果廉政公署唔將呢個大貪官繩之以法，香港人條氣點順吖，叮！