政壇：銀行反佔中有口難言
設計圖片
由學者發起嘅「佔領中環」行動聽日將發起首個大型商討日，四大商會同唔少親中團體已經紛紛以登廣告或撰文形式痛陳利害反對佔中，但掌握中環命脈嘅金融同銀行界就似乎冇乜動靜，唔通佢哋覺得佔中只係小事一樁，唔值得關注？
設計圖片
已有應變方案
立法會金融界議員「星爺」吳亮星尋日解釋，其實銀行界一直密切留意佔中行動發展，銀行界並唔係唔想出聲批評佔中影響本港金融中心地位，只係唔想向外界錯誤傳遞訊息，惟有變咗「沉默的羔羊」，乜都唔講得，一直按兵不動。
至於點解唔登廣告反對佔中，佢就話銀行界素來唔主張亂用小股東嘅血汗錢，更加唔會攞錢去登廣告，免助長佔中嘅氣燄，咁就真係啞仔吃黃連，有苦自己知囉！
中環雲集各國頂尖企業，本港三間發鈔銀行總部都設喺此地，星爺話自○三年沙士一役後，金融管理局要求各銀行制訂應變方案，萬一有重大事故或災難發生，銀行都可以即時將網上交易等服務轉移去其他國家，例如中銀會將部分運作轉移去深圳、滙豐去上海、渣打去印度等，短時間內確保服務不受影響。
雖然銀行運作仍然可以勉強維持，但星爺話，如果佔中到時引起國際投資者嘅憂慮，覺得香港唔再係安全城市，本港國際金融中心地位可能從此一蹶不振，落後其他鄰近地區，到時邊個應該為事件負責呢？
