上品無寒門,下品無世族。古時候嘅「九品中正制」將老百姓分為三六九等,上等人飛黃騰達,下等人永無出頭之日。估唔到今時今日嘅香港教育一樣搞呢一套,學校分等級,學生分貴賤,所謂春風化雨,有教無類,知識改變命運,對唔住,一早冇呢支歌仔唱嘞。

嗱,又有多一間名校欲將基層子弟拒諸門外嘞。百年名校聖士提反女子中學及附屬小學,計劃二○一五年轉為直資學校,學費水漲船高,中學每年收費三萬五千大元,小學亦要三萬大元,冇錢點算?校方話就話有獎助學金,不過係人都知呢啲只係得個樣,受惠學生少之又少。換言之,冇錢想入名校,咪使旨意!

名校認錢唔認人,辣唔少家長同舊生,直斥校方飛擒大咬,背離公平教育原則。一個今年升讀大學二年級嘅舊生話喎,自己出身基層家庭,如果母校當年已經係直資學校,相信自己冇機會入讀,前路亦難行得多。有教育界人士慨嘆,以前教會學校辦學講理想有原則,仲會取錄孤兒添,邊似得家陣一味向錢看咁忘本吖。

冇錯嘞,香港表面上人人有書讀,機會均等,實際上搞教育特權,嫌貧愛富,香港跨代貧窮不斷惡化,咪就係教育不公引起嘅囉。講真,近年傳統學校紛紛轉為直資學校,一邊接受公帑資助,一邊收取昂貴學費,根本就係諗縮數,公帑袋袋平安之餘,使錢又無王管,乜都自己話晒事,幾爽呀。連前任教育局高官都承認,政府對直資學校完全「無牙力」,你話係咪豈有此理吖!

富家子弟條條大路通羅馬,基層學童愈窮愈見鬼,講到尾,根本係港府一手造成。唔係咩?當局對直資學校有種種優待,既不受法團校董會條例限制,又可以自行收生,仲可以英語及小班授課,滿足晒市場要求,大大減輕當局壓力,自然對直資學校無任歡迎。至於基層子弟入讀名校嘅機會係咪被剝奪,教育貧富懸殊係咪愈來愈嚴重,當局就關人個關。

計太一叮話齋,香港回歸十六年,教育政策亂足十六年,由母語教學到新高中課程,冇一瓣唔係搞到一鑊泡,冇一瓣唔係搞到學校、學生、家長疲於奔命。家陣直資學校貴族化,不過係千瘡百孔嘅教育制度下又一產物,可憐嘅係基層子女輸在起跑線上,想話透過知識脫貧,難咯!

第一手消息請下載on.cc東方互動iPhone/iPad/Android/Windows Phone Apps