助人隨時變害人 居屋買家望樓嘆
有瓦遮頭，夢寐所求。政府推出白表免補地價買二手居屋計劃，首批二千五百名中籤者尋日開始申請批准書，最快月中可以正式入市。不過咁，中籤者係咪真係可以順利上車，依家仲係未知之數。
嗱，自從有關計劃舊年推出之後，居屋樓價係咁飆升，唔只已抵銷免補地價嘅優惠，而且遠遠超出好多中籤者當初預算。更弊嘅係，由於有關計劃問題多多，買家隨時因為畀唔起首期，只能望樓興嘆嘅咋。
白表免補地價買二手居屋計劃問題多多，完全係因為政府未做足功課就匆匆推出。由於未補地價居屋受制於房委會三十年擔保期，買家申請按揭，銀行會相應扣減樓齡，即係話居屋愈舊，按揭年期愈短，令買家大失預算。
大家都知道，現時全港二百四十幾個居屋屋苑，四分一樓齡已超過廿五年，就算揀樓齡較低單位，居屋價格過去一年升咗兩成半有多，銀行閂水喉，普遍估價不足，再扣埋樓齡，首期成本必然大增，買家就算勉強入市，一旦環境有變，息率回升，供樓負擔加重，隨時可能斷擔挑o架。
有人就批評得啱嘞，既然當局有心幫助無殼蝸牛置業，就應協助白表申請人取得更長年期嘅按揭，例如由房委會為銀行分擔部分風險，否則，名義上有白表免補地價買二手居屋政策，實際上等於冇政策。
冇錯嘞，港府好心做壞事，幫人變害人，都唔係第一次嘅喇。呢，過去港府尤其係董建華時代推出唔少幫助市民置業嘅措施，結果樓市一冧，搞到通街負資產，唔知幾多人燒炭。前車可鑑，唔該港產官僚唔好再幫倒忙喇。
講嚟講去，根治房屋問題，增加供應係唯一途徑，小修小補根本無補於事，如果病急亂求醫，隨時撞板多過吃飯添吖。政府一時話填海，一時話發展岩洞，一時話利用天橋底，一時又話將政府停車場改建商住大廈，計劃多多，到頭嚟全部得個講字。
日前政府披露劏房調查結果，劏房戶多達十七萬人，有立法會議員指劏房呎價仲貴過豪宅，建議當局興建中轉屋安置居住環境較差嘅劏房戶。其實，如果當局有地興建中轉屋，早就用嚟興建公屋及居屋喇。
有頭髮冇人想做瘌痢，住得起私樓邊個想住劏房吖？所謂房屋問題係施政重中之重，睇嚟都係大隻講居多嘅喇，叮！
