一個閘欄拖九年 敷衍塞責怪事多

申訴專員公署發表調查報告，踢爆政府部門連串行政失當，其中一份報告係批評漁護署及運輸署互相扯皮。件事係咁嘅，漁護署同運輸署等多個部門○三年底決定為金山郊野公園加裝閘欄，仲指定日常架設工作由漁護署負責，點知漁護署指閘欄位置對車輛構成潛在危險，要求運輸署移位，結果一拖就拖足幾年，直到一○年運輸署至向路政署發出施工要求，輾轉拖至舊年三月先至完成工程。

你話港產官僚係咪做嘢o架？裝設一道小小閘欄，居然互相交波，一拖再拖，時間仲長過興建赤鱲角機場，都唔知好笑定好嬲。申訴署報告鬧得啱o架，漁護署喺呢件事上擺出事不關己嘅姿態，態度消極，思想僵化，而運輸署亦無妥善跟進事情，令閘欄一直形同虛設；兩個部門互相推搪，只係狹隘地考慮各自工作，既無充分協調，又欠缺承擔，情況令人不能接受。

泥水佬開門口，過得自己過得人。港產官僚裝設閘欄拖足九年，推搪失職，就算過到申訴專員嗰關，都過唔到自己嘅良知啦，都過唔到市民嗰關啦，吓話？無錯，對縮骨官僚嚟講，裝設閘欄只係小事一宗，問題係如果連咁小嘅事情都做唔好，其他大事點可能做得好呢？港府施政又點可能唔亂象叢生呢？

正所謂，見微知著，從一個小小閘欄就可以睇到港府嘅無能。如果你問，回歸以來點解施政亂七八糟呀？點解經濟停步不前呀？點解爭拗多多嘈喧巴閉呀？答案好簡單，咪就係一眾大官小吏得過且過，胡混度日囉！

嗱嗱嗱，官僚胡混度日嘅後遺症好多o架，何止一道閘欄被拖延，成個香港都拖慢晒。大家睇吓，十大基建唔係爛尾就係超支，六大產業無影無蹤，醫療亂象無奇不有，教育問題千瘡百孔，最離譜係家陣連環境衞生都無人理，周街垃圾，污糟邋遢，再咁落去，香港仲有乜希望呀？

咁講啦，回歸十六年，港府嘅管治其實就如嗰道郊野公園閘欄，有名無實，形同虛設。咪話太一叮唔提醒，當局再唔撥亂反正，成個香港遲早失守嘅咋，叮！