改善服務得把口 官僚玩殘老人家

係人都知，老人家最需要嘅其中一項服務就係醫療，可惜今時今日連睇門診都唔易。有團體調查發現，超過八成受訪長者批評醫管局普通科門診難預約，電話預約名額經常爆滿，平均撥三次至接通一次，煩不勝煩，仲慘過大病。三成半受訪長者焗住轉睇私家醫生，近一成人寧願服用成藥，甚至索性放棄治療。

呢，尋日有批長者齊齊「拮爆」貼有電話圖片嘅氣球，寓意「打爆電話」都未約到期，促請當局改用真人接聽預約電話以及重新引入排隊輪候門診。

提起電話預約門診服務，真係唔講猶自可，一講把鬼火。醫管局○六年起推出普通科門診電話預約服務，口口聲聲方便長者，結果變咗折磨長者。嗱，預約電話程序繁複到嘔，老人家被玩殘，未約到時間已經病多幾錢重。當局多次承諾改善服務，簡化程序，到頭來又係大隻講，係咁意加幾條線就算數，杯水車薪，敷衍了事，根本就係搵笨。

話時話，政府所謂改善長者服務，從來都係虛應故事，有邊次係真心o架。好似發放長者生活津貼咁，本來引入資產審查已經被批評唔合理，仲要安排甩甩漏漏，烏龍百出，唔少合資格長者收唔到綠色通知書，反而收到需要重新申請嘅黃色通知書，唔知幾時至可以收到錢，你話係咪攞老人家嚟搞吖。

仲有吖，社署設立長津電話熱線，話方便老人家查詢喎。點知熱線變冷線，根本無法接通，有長者投訴打咗三日電話都唔通，連留言服務都無，都唔知搵邊個查詢，擺明玩弄公公婆婆啫。

政府安老政策口惠實不至，問題又點只咁多吖。最離譜就係安老宿位長期供不應求，每年有幾千名長者等到死都住唔到安老院，簡直係香港嘅恥辱。

改善服務得把口，官僚玩殘老人家。政府以官為本，以老為笨，簡直係忤逆。咪話太一叮唔提醒港產官僚，虐待老人家天理不容，今日安老變虐老，他朝君體也相同，唔該快快諗辦法改善長者服務，如果唔係，小心臨老過唔到世吖，叮！