借殼開位惹爭議 最怕扶貧變扶官
開講有話，萬千寵愛在官身。今時今日，喺香港做官真係令人羨慕o架，人工高，福利好，無憂無慮，仲可以豪飲豪食，周遊列國添。呢，港府又以加強統籌扶貧同人口政策工作為由，特別增設政務司司長辦公室專員一職，禮聘社會福利署署長聶德權調任，由於新職屬於臨時編外職位，當局可以繞過立法會，直接撥款請人。
港府話喎，因為政務司司長需要統籌扶貧委員會同人口政策督導委員會工作，同多個相關部門溝通，所以有必要聘請資深官員協助。但立法會議員就唔同講法喇，佢哋質疑港府「借殼上市」，因為增設副政務司司長職位失敗，所以改用非公務員合約加兵添將，早前先至請咗高級特別助理，家陣又請辦公室專員，完全當立法會無到。
即係咁，借唔借殼其實唔係重點，關鍵在於新官係咪物有所值。港府開位請人，統籌扶貧工作，如果真係做到嘢，幫到窮人，使多多錢納稅人都願意埋單，但如果做唔到嘢，盞多隻香爐多隻鬼，使多一蚊都係浪費公帑嘅咋。
講開扶貧，真係得啖笑。你知啦，前朝貪曾政府嫌貧愛富，高官唔係掛住同富豪勾勾搭搭，就係頻頻北上劈酒拉關係，完全當窮人隱形，搞到愈扶愈貧，貧窮人口年年激增。梁振英政府雖然拍心口加強扶貧力度，敲鑼打鼓成立扶貧委員會，又話設立貧窮線，又話研究全民退保，講到天花龍鳳，可惜到今時今日都係講多過做，所謂扶貧政策依然只聞樓梯響。
呢，扶貧委員會前日召開第四次會議，討論如何支援無攞綜援嘅低收入家庭，結果又係得個講字。有人話應該優化交通津貼，有人話要針對不同家庭嘅實際情況提供不同資助，有人建議當局發放租金津貼，意見多多。當局又點睇呢？扶貧委員會主席林鄭月娥話喎，發放租金津貼可能鼓勵業主加租，適得其反。唉，咁又唔得，咁又唔通，究竟應該點做呢？
講多無謂，食多會滯，再拗落去都係嘥氣，不如學立法會議員話齋，每人派一萬元，人人有份，咁仲實際喇！
所以話，借殼開位惹爭議，最怕扶貧變扶官。太一叮忠告新科專員聶德權，醒醒定定做好份工，切實推動扶貧政策，如果唔係，窮人隨時搵你算帳o架，叮！
