問責制千瘡百孔 海事處自我沉淪

其實，港府唔係無人駕駛，只係船長瞌緊眼瞓，所以咯喎，海難死者家屬尋日發表聯署公開信，無非都係想鬧醒佢哋啫。呢，公開信炮轟海事處處長廖漢波失職，搞到海事安全千瘡百孔，服務唔到市民，反而為市民埋下致命陷阱，釀成今次撞船慘劇；更令人不齒嘅係，海難發生至今，廖漢波既無膊頭承擔責任，亦無腰骨承認錯誤，令海難家屬憤恨難平。家屬要求港府成立獨立委員會，全面調查海事處嘅失職同當中種種問題，以提高調查報告公信力，減低公眾對海事處「自己人查自己人」嘅疑慮。

唉，公開信一字一淚，真係聞者心酸。正所謂感同身受，唔只海難家屬憤恨難平，全港市民都義憤填胸吖。海事處疏忽職守，監管不力，間接害死三十九條寶貴人命，如果喺外國，早就有高官問責落台啦，點會好似港產官僚咁推波卸責，賴皮卸膊吖。喂，害死咁多人，唔肯問責都夠衰啦，居然連道歉都慳番，你哋仲有冇羞恥之心o架？

講到羞恥之心，海事官僚應該都無乜嘅喇，如果唔係，都唔會害死人之後仲有面自己查自己啦。嗱，海難家屬要求成立獨立調查委員會，徹查事件，追究責任，市民都贊成o架。試諗吓，要求一班連錯都唔敢認嘅厚顏高官自揭失職，自爆醜聞，可信度仲低過一眾高官嘅民望水平線囉。咪話太一叮踢爆，官僚自己查自己，即係自己放生自己，所謂調查又係查吓查吓無咗下文嘅咋！

咁講啦，撞船慘劇就係一面鏡子，唔只照出海事處糜爛不堪，更加照出問責制千瘡百孔。講起都冇人信，發生咁大件事，居然無人問責，無人落台，無人道歉，睇怕全世界都搵唔到第二個地方係咁囉。港產官僚有責不問，有錯不認，唔怪得港府施政錯漏百出，亂象叢生喇。

講來講去，都係前特首曾蔭權爵士種下嘅禍根。港府阿一腐敗瀆職吖嘛，手下官員咪怠忽職守囉，搞到成個公務員系統綱紀敗壞，視制度如無物，香港畀貪曾一手斷送嘅，何止係廉潔同法治，仲有專業高效嘅公僕文化。貪官禍港，真係後患無窮。

問責制千瘡百孔，海事處必然沉淪。外國性感女星切乳防癌，港府亦好應該切波防癌，切走廖漢波呢塊庸官贅肉，防止有責不問嘅癌細胞繼續喺港府擴散，叮！