輔助線步步驚心 運輸署靠害行人
顧名思義，行人輔助線嘅功能就係輔助行人過馬路，但大家又知唔知，香港有一種騎呢行人輔助線，唔止唔可以輔助行人，仲分分鐘靠害行人，搞到陷阱處處，步步驚心，真係荒謬絕倫。
呢類「害人輔助線」嘅正名叫「沒有交通燈控制的行人輔助線」，聽個名都知騎呢啦，無交通燈號又點輔助行人過馬路呢？其實，嚴格嚟講，路口唔係無交通燈，不過只係為車輛而設啫，即係話，行人過馬路無燈號可依，根本唔知車輛幾時停，幾時行，搞到險象環生，意外頻仍。呢，過去三年，呢類行人輔助線已經發生咗四十二宗交通意外，造成五十人受傷，你話運輸署係咪靠害吖！
行人輔助線居然無行人紅綠燈指示，等於製造馬路陷阱，唔怪得馬路如虎口啦。即係咁，運輸官僚係咪存心靠害唔敢講，不過智力有問題就肯定嘞，呢類行人輔助線幾十年前設喺人車稀少嘅路口，原意方便行人過馬路，唔使呆企路口癡癡地等；只係時移世易，社會變遷，以前人車疏落嘅路口好多已經變成人車爭路，運輸官僚唔識與時並進，為路口加設紅綠燈，咪害到行人步步驚心，虎口偷生囉。
更離譜嘅係，害人輔助線靠害行人，運輸署唔係唔知o架，早喺十二年前已經表明應該避免設於人車繁忙路口，惟情況至今未見改善，全港現時仲有一百一十條呢類輔助線，簡直危機四伏。
唉，助人變害人，路口變虎口，雖則話港產官僚無心無肺，路人皆知，但係都要帶個腦返工。一次意外足以致命，交通安全唔係講玩o架。計太一叮話齋，搞到行人步步驚心嘅，唔止係呢條「沒有交通燈控制的行人輔助線」，更加係呢個「沒有人腦控制的運輸署」，馬路陷阱發現咗十二年都無人處理，無人跟進，證明港產官僚得過且過，邊有心做好呢份工o架。
見微知著，香港亂象叢生，真係愈諗愈唔對路，港府好似一個無紅綠燈指揮嘅路口，而香港特別行政區就淪為「特別陷阱區」。嗱，害人輔助線係馬路陷阱，海難慘劇係海上陷阱，劏房危機係居住陷阱，八達通無王管係消費陷阱，而公立醫院為病人換錯心更加係醫療陷阱……再咁落去，唔好話市民過馬路險象環生，港府管治百病叢生隨時走上窮途末路吖！
港府宣傳口號話，路上零意外，香港人人愛。不如改成：官僚零癡呆，香港人人愛。各位港產官僚，小心睇路吖，叮！
