五路圍剿貪湯 誓保廉潔淨土

立法會將就貪湯外訪、酬酢同送禮超支等問題成立十三人專責委員會，籌備小組尋日首次會議確立調查內容，睇嚟「升堂」指日可待。

呢次公審貪湯認真大陣仗，除咗立法會嘅專責委員會、政府帳目委員會同保安事務委員會之外，仲有廉政公署嘅刑事調查，以及由特首成立嘅四人獨立檢討委員會，形成「五路剿貪」之勢，全方位追殺，睇吓呢隻過街老鼠匿得去邊。

依家就好似將五條繩索套住貪湯咁，不過，可唔可以將佢繩之以法，就要睇力度夠唔夠嘞。

講番專責委員會呢筆，由於當初大部分保皇派議員反對引用權力及特權法查貪湯，委員會並冇傳召權，變咗隻冇牙老虎，就算貪湯繼續耍賴皮避重就輕，亦奈佢唔何。

至於帳委會嘅公開聆訊，計計埋埋前後做咗四次，但都係姿勢多過實際，議員唇槍舌劍，貪湯死蛇爛鱔，見唔到有乜實際效果。加上部分保皇派議員表現懶懶閒，甚至懷疑有意擺烏龍，放軟手腳放生貪湯，再咁落去睇怕情況亦不容樂觀。

貪湯本人就更離譜，出席帳委會聆訊，唔係狡辯，就係迴避，詐傻扮懵，答非所問，砌辭狡辯，甚至花言巧語帶議員遊花園，並且多次以正接受刑事調查為藉口迴避問題，或者索性將責任推晒畀前任。對呢啲厚顏無恥之徒嚟講，立法會聆訊等於提供咗狡辯機會，作用可想而知。

有人就講得啱嘞，話就話五路追殺大包圍，其實專責委員會、立法會帳委會、保安事務委員會以及四人獨立委員會都只係虛招，冇辦法擊中要害。委員會有權調查，冇權懲罰，面對死不悔改嘅貪官，充其量只能表示遺憾或譴責。

治亂世用重典，治貪官亦一樣，要防止貪湯逃過法律制裁，唯一希望就係廉署嘅刑事調查。要保住香港呢塊淨土，除咗要清算貪湯呢個一手摧毀本港廉潔核心價值嘅貪官，千祈咪忘記仲有前特首曾蔭權爵士呀。如果唔係貪曾呢個「恩師」其身不正，貪威識食，自把自為，無視制度，想做就做，「愛將」貪湯又點會有樣學樣，香港又點會出咗對「絕代雙貪」吖，叮！