道歉一拖大半年 海難究責勿空言
錯就要認，打就企定。一個有廉恥嘅人，做錯事立即道歉，承擔責任係應有之義，但港產官僚出名「禮義廉」，做錯事只會推卸責任，就算三十九條人命間接死喺佢哋手上，都要拖八個月先至肯道歉。呢個「遲來的道歉」到底有冇誠意，大家心中有數啦。
講緊嘅之唔係海事處處長廖漢波囉。舊年十月一日南丫島海難造成死傷枕藉，死因庭揭發海事處疏懶失職，海上安全漏洞百出，作為一處之長嘅廖漢波責無旁貸。不過咁，今時今日港產官僚已經係「無恥」嘅代名詞，就算被死難者家屬轟為「泯滅良知」，廖漢波依然好官我自為之，企硬唔道歉，吹咩！
好嘞，海難發生至今大半年，廖漢波尋日突然一反常態，公開向死難者家屬鞠躬認錯，仲煞有介事話作為部門首長，對南丫島海難感到痛心及難過，衷心向死難者家屬、傷者及市民道歉云云。而運輸及房屋局局長張炳良亦一改口風，聲稱為咗客觀公正，決定改由局方對海事處作出內部調查，避免海事處「自己人查自己人」。
嗱，市民眼睛係雪亮嘅，到底係有人良心發現吖，抑或係礙於輿論壓力認衰，大家睇得一清二楚。試想想，如果家屬唔係忍無可忍，發公開信控訴官僚冷血，引起社會嘩然，當局會唔會有反應呢？又如果唔係群情洶湧，立法會經濟發展事務委員會尋日一致通過動議，要求當局以獨立及專業原則調查，違規官員須承擔責任，港產官僚又會唔會主動認錯呢？正如立法會議員話齋，廖漢波家陣先嚟道歉，根本係為勢所逼，毫無誠意。
再講吖，雖然家陣改由運房局對海事處調查，但難保唔係走過場咋。眾所周知，官官相衞係特區政府施政一大特色，無論發生幾嚴重嘅事故，從來冇官員需要問責。遠嘅唔講，土瓜灣塌樓慘劇造成四死兩傷，屋宇署事前驗樓明明話結構冇問題，言猶在耳，樓宇即轟然倒下，到頭來所有責任由裝修承建商一人擔起，屋宇署無人被追究。
咁講啦，撞船慘劇係一面鏡子，唔止照出海事處糜爛不堪，更加照出問責制千瘡百孔。人無信不立，官無信不威，如果港府仲有少少羞恥之心，仲想挽回僅有嘅管治威信，就必須對失職官員有責必究，唔可以再空口講白話，咪以為講句對唔住就可以蒙混過關，叮！
