NBA季後賽周三秩序

NBA新「紋」化愛意無限！紋身已成為潮流時尚，刺青熱潮早已殺入運動界，NBA可算是紋身大舞台，一眾「公仔佬」驟眼睇落「冇忽好肉」，實情就「紋」間有情。當中JR史密夫（JR Smith）、高比拜仁（Kobe Bryant）及吉遜（Daniel Gibson）將阿媽、老婆、囡囡擺上身，用永不磨滅的圖案及字句向摯親表達愛意，比起一班貪型、貪潮才紋身的人有意思得多。

NBA季後賽周三秩序

NBA東西岸季後賽形勢

紋身多到數唔清 最想感動人

JR史密夫堪稱NBA「紋身天王」，15歲便擁有第1個紋身，直至全身紋上70個圖案後已數不清現時有多少隻「公仔」。JR自爆每次都會到不同的紋身店舖找靈感，但就經常「混吉」無幫襯，「啱」feel才會紋。以「生活態度」來形容紋身的JR，坦言刺青為自己帶來更多Fans，並指能感動人的紋身最令自己有滿足感。

吉遜「老婆」上身證一條心

該名紐約人「後備殺手」向《紐約時報》稱：「我鍾意身上每個紋身，亦都冇後悔搞到個身『花喱碌』，手腕上面嘅祖父母出生、過身日期好有意義，但最鍾意係我心口上面嘅母親肖像，佢第一眼見到嘅時候已經感動到喊到豬頭咁！」騎士射手吉遜去年尾亦決定紋身寄意，將歌星妻子Keyshia Cole的肖像紋上手臂並上載到twitter，用行動證明對老婆情比金堅，就連Keyshia的Fans亦大讚吉遜有心思！

臨老先開始「潮」的湖人球星高比拜仁，最近趁養傷期間戴着保護靴到紋身店添上新圖案，「小飛俠」於右臂上紋上大女Natalia Diamante及細女Gianna Maria-Onore的名字，附近配上一粒閃閃發光的鑽石圖案，寓意兩個囡囡對他來說，就像鑽石一樣珍貴，高比更表示期待來季傷愈後帶埋囡囡「落場」，正式廿四孝老竇。