吸煙特區亂紛紛 一港兩制太胡混

呢類吸煙特區就係違規網吧。本報記者巡查全港六間大型連鎖網吧，揭發其中四間暗設吸煙區，默許客人一邊上網一邊上電，不知就裏嘅市民入去幫襯，見到雲煙裊裊，疑幻疑真，一時恍如置身魔域，一時恍如置身毒氣室。嗱，吸煙特區雖然唔見得光，但係經營者明目張膽，電腦旁邊放煙灰缸，枱櫈下面煙頭任掟，而當有客光臨，職員更加單刀直入問：「吸煙區定非吸煙區呢？」簡直攞正牌一樣呀！

一國兩制雖然楚河漢界，但係河水都可以犯井水啦，更何況係一店兩制嘅雲煙分界？咁即係逼非吸煙顧客同職員吸二手煙嘅啫。更離譜嘅係，有網吧吼準夜晚少巡查嘅漏洞，晚上八時過後全面解禁，全場任吸，直頭當控煙辦透明。

其實，控煙辦唔係透明，係爛透啫。禁煙條例實施多年，網吧居然可以打開門口招徠煙民，控煙辦究竟做乜o架？網吧淪為吸煙特區，烏煙瘴氣亂象叢生，唔係講玩o架，一來二手煙危害市民健康，二來網吧堆滿電腦，散熱如果不佳已經特別容易引致火警，如果加埋顧客日夜煲煙製造火種，情況就好似喺油站不停點火柴，遲早爆大鑊咋。控煙辦執法不力，坐視違規網吧製造消防危機，簡直靠害。

咁講啦，吸煙特區一港兩制，反映港府施政根本由頭到尾都係「講人治港」，吹水唔抹嘴，搞到禁煙條例猶如一紙空文，控煙辦更加形同虛設。呢，記者致電政府熱線投訴網吧違規，對方回應會安排巡查，你估結果點吖嗱？三日之後依然杳無音信呀！港產官僚咁樣嚟執法，嚟執煙頭就差唔多！

所以話，有網民留言跪求無煙味網吧，其實佢哋更加要跪求有腰骨官僚。控煙辦死蛇爛鱔，平時疏於檢控，收到投訴亦懶得巡查，禁煙條例點會唔如煙似夢，似有還無吖？話時話，官場入面胡混度日嘅無脊椎動物多如牛毛，控煙辦只係比較礙眼咁解。網吧電腦密集，位處大廈又經常被揭發消防通道阻塞，處處暗藏消防隱患，現行條例居然無特別規管，呢樣已經係失職啦。

吸煙特區亂紛紛，一港兩制太胡混。控煙辦咪再胡混嘞，快啲做嘢啦，如果吸煙特區繼續烏煙瘴氣，即係代表你哋無存在價值，咁就不如早啲收檔啦，叮！